Rüstəm İbrahimbəyov Azərbaycana gələ bilməyəcək - Eynulla Fətullayev Politoloq Arif Yunus “Azadlıq” qəzetinə müsahibəsində bildirib ki, Milli Şuranın sədri Rüstəm İbrahimbəyov Azərbaycana qayıtsa, həbs ediləcək. O, Rüstəm İbrahimbəyovun Azərbaycana qayıtmasına mane olacaq qüvvəllərin olduğunu deyib. “Rüstəm Ibrəhimbəyovun Azərbaycana qayıtmasına da mane olacaqlar. Yaxın vaxtlarda onun buradakı işində şübhəli nəsə tapacaqlar, bəlkə cinayət işi qaldırdılar. İyul-avqust aylarında eşidəcəyik ki, Rüstəm Ibrahimbəyov cinayətkardır. Digər müxalifət liderlərinə qarşı təxribat, həbslər olacaq. Ona görə də optimist olsam da, bəzi məsələlərə ehtiyatla yanaşıram. Çünki Azərbaycan Almaniya, ABŞ deyil. Orada demokratiya var. Azərbaycan isə analoqu olmayan ölkədir. Ona görə burada birmənalı nəsə demək çətindir.” Hüquq müdafiəçisi Eynulla Fətullayev Arif Yunusun sözlərinə münasibət bildirib. E. Fətullayev AZXEBER.COM-a açıqlamasında Rüstəm İbrahimbəyovun Azərbaycana qayıtmasının gözlənilən olmadığını bildirib. “O bilir ki, geri dönsə, həbs ediləcək. Rüstəm İbrahimbəyovun həbs edilməsində qeyri-adi heç nə yoxdur, çünki onun haqqında cinayət işi açılıb və araşdırma aparılır. Bu da o deməkdir ki, hətta R.İbrahimbəyovun vahid namizəd kimi çıxış etməsi də sual altındadır. Hələ ki, bu sual altında ciddi fikir ayrılıqları davam etdirilir. Çünki müsavat başqanı da öz namizədliyindən imtina etməyib. Ona görə də o, Azərbaycana vahid namizəd statusunda qayıtmayacaq. Onun Azərbaycandan getməsinin başlıca səbəblərindən biri həbs olunma ehtimalı idi və onun geri dönüşü gözlənilmir”. Hüquq müdafiəçisi “Milli Şura” nın Azərbaycan siyasətinə heç bir yenilik gətirə bilməyəcəyini də vurğulayıb: “Əslində, “El” hərakatı Azərbaycanda yeni nəfəs kimi təqdim edilsə də, sonradan biz gördük ki, bu hərəkatın tərkibində yalnız qeyri-demokratik insanlar toplaşdı. İndi də “Milli Şura”ya eyni insanlar rəhbərlik edir. “Milli Şura”ya gəlincə isə bu, Azərbaycanda fəaliyyət göstərmiş koalisiyaların təkrarıdır. Demək olar ki, bu şura Azərbaycana yenilik gətirmək gücündə deyil”.
Fatimə İbrahimova
