24 oktyabr BMT günü münasibətilə millət vəkillləriBMT-nin Bakı ofisinin rezident-əlaqələndiricisi Antonio Broekin ilə görüşüblər.
AZXEBER.COM xəbər verir ki, Milli Məclisin İnsan hüquqları komitəsinin sədri, ATƏT PA-da Azərbaycan nümayəndə heyətinin üzvü Rəbiyyət Aslanova və MM-in Beynəlxalq münasibətlər və parlamentlərarası əlaqələr komitəsinin üzvü, Azərbaycanın AŞPA-da və Avronestdə nümayəndə heyətinin üzvü Qənirə Paşayeva 24 oktyabr BMT günü münasibətilə BMT-nin Bakı ofisinin rezident-əlaqələndiricisi Antonio Broekin ilə görüşüblər.
BMT-nin Bakı ofisinin rezident-əlaqələndiricisi Antonio Broekini 24 oktyabr - BMT günü münasibətilə təbrik edən Milli Məclisin İnsan Haqları Komitəsinin sədri Rəbiyyət Aslanova və millət vəkili Qənirə Paşayeva Azərbaycanın BMT və onun ixtisaslaşmış qurumları ilə bütün istiqamətlərdə əməkdaşlığa böyük önəm verdiyini deyiblər. Görüşdə Azərbaycanın BMT üzvü olan ölkələrin 155 səsini toplayaraq 2012-2013-cü illər üzrə BMT Təhlükəsizlik Şurasının qeyri-daimi üzvü seçilməsinin mühüm hadisə olması qeyd olunub və Azərbaycanın BMT və onun ixtisaslaşmış qurumları ilə bütün istiqamətlərdə əməkdaşlığının daha da genişlənməsi istiqamətində müxtəlif layihələrin həyata keçirildiyi və Azərbaycan dövləti tərəfindən bu layihələrin reallaşmasına böyük dəstəyin göstərildiyi bildirilib. BMT Təhlükəsizlik Şurası tərəfindən Dağlıq Qarabağ münaqişənin nizamlanması ilə bağlı qəbul edilən 4 qətnamənin yerinə yetirilməsinin vacibliyi millət vəkilləri tərəfindən vurğulanıb. BMT-nin Təhlükəsizlik Şurasının Ermənistan silahlı qüvvələrinin Azərbaycanın işğal olunmuş ərazilərindən dərhal çıxarılmasını tələb edən bu qətnamələrə əməl olunmamasının ağır nəticələri, Beynəlxalq hüquq prinsiplərinə Ermənistanın məhəl qoymaması xüsusi qeyd edilmişdir. Məlum qətnamələrdə Azərbaycanın suverenliyinə, ərazi bütövlüyünə hörmət ifadə olunur. Öz yurd yuvalarından qovulmuş Azərbaycanlıların doğma torpaqlarına qayıtmaq hüququ təsdiqlənmişdir. Bu gün hər bir Azərbaycan vətəndaşı BMT-nin bu sahədə fəaliyyətinin canlanmasına böyük ümid bəsləyir.
BMT-nin Bakı ofisinin rezident-əlaqələndiricisi Antonio Broekin təmsil etdiyi qurumun Azərbaycan ilə bütün istiqamətlərdə əməkdaşlığa böyük önəm verdiyini və əməkdaşlığın getdikcə daha da genişlənməsinin və Azərbaycanın BMT TŞ-nın qeyri-daimi üzvlərindən biri kimi seçilməsinin təqdirəlayiq olduğunu deyib. Görüşdə BMT-nin Azərbaycanda həyata keçirdiyi layihələrdən, Azərbaycanda sosial problemin səmərəli həllindəki nailiyyətlərdən, “Azərbaycan 2020: Gələcəyə baxış” İnkişaf konsepsiyasının əsas müddəalarından bəhs edilmişdir.
Görüşdə həmçinin qadın haqları, məişət zorakılığına qarşı mübarizə, qızların təhsil almaq hüquqları və digər qarşılıqlı maraq doğuran məsələlər və gələcəkdə həyata keçirilməsi vacib olan bir sıra maraqlı layihələr ətrafında da fikir mübadiləsi aparılmışdır.
