Beynəlxalq reytinq agentliyi "Moody’s Ratings” Kapital Bank-ın Ba2 uzunmüddətli depozit reytinqini, ba3 səviyyəsində əsas kredit qiymətləndirməsini (Baseline Credit Assessment – BCA) və müsbət proqnozunu (Positive Outlook) təsdiqləyib. Bu qərar bankın maliyyə dayanıqlığını bir daha təsdiqləyir.
Agentliyin qiymətləndirməsinə əsasən, reytinq bankın güclü aktiv keyfiyyəti, yüksək gəlirliliyi, bazar maliyyələşməsindən məhdud asılılığa malik dayanıqlı maliyyələşmə bazası və yüksək likvidlik səviyyəsi ilə əsaslandırılır.
"Moody’s” bankın gəlirliliyinin növbəti 12–18 ay ərzində də ümumilikdə sabit qalacağını gözləyir. Agentliyin rəyinə görə, kredit portfeli üzrə gəlirliliyin artması və komissiya gəlirlərinin yüksəlməsi bankın maliyyə nəticələrini dəstəkləməyə davam edəcək. Eyni zamanda, risklə ölçülmüş aktivlərin artım tempinin yavaşıması kapital mövqeyi üzərindəki təzyiqi azaldacaq.
"Moody’s”, həmçinin, Kapital Bank-ın Azərbaycanın aktivlər üzrə ikinci ən böyük bankı olduğunu, kreditlər və müştəri depozitləri bazarında əhəmiyyətli paya malik olduğunu vurğulayıb. Agentlik bankın uzunmüddətli depozit reytinqi üzrə müsbət proqnozunu Azərbaycanın suveren reytinqi üzrə müsbət proqnoz və bankın fəaliyyət göstərdiyi əlverişli əməliyyat mühiti ilə əlaqələndirib.
Ümumilikdə, "Moody’s”in qiymətləndirməsi Kapital Bank-ın güclü maliyyə göstəricilərini və bazardakı mövqeyini əks etdirir.
Ölkənin birinci bankı Kapital Bank PAŞA Holding-ə daxildir və Azərbaycanda ən böyük filial şəbəkəsi, 116 filialı, 51 şöbəsi və 13 Rəqəmsal Mərkəzi ilə müştərilərin xidmətindədir. Bankın məhsul və xidmətləri barədə daha ətraflı məlumat almaq üçün https://kapitalbank.az saytına, 196 Əlaqə Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz. Nağd pul krediti və Birbank kartı sifarişlərinizi onlayn formada həyata keçirə bilərsiniz.
