“Biz bu gün çalışmalıyıq ki, qapımızda erkən qol görməyək. Əks halda hər şey bizim üçün pis qurtara bilər. Çünki belə vəziyyətdə millimizin müdafiəsində çaşqınlıq yarana bilər. Artıq qələbə qazanmağın vaxtı gəlib çıxıb”.

Qol.Az-ın müxbiri ilə söhbətində bu sözləri AZAL klubunun baş məşqçisi Vaqif Sadıqov bu gün DÇ-2014-ün seçmə mərhələsində Şimali İrlandiyaya qarşı keçiriləcək oyun barəsində danışarkən deyib.

V.Sadıqov bildirib ki, futbolçularımız daha az qayda pozuntusuna yol verməyə çalışmalıdır: “İmkan verməməliyik ki, rəqib duran toplara sahib olsun. Yəqin ki, bu barədə Berti Foqts oyunçulara tapşırıqlarını verəcək. Qapımıza doğru standart vəziyyətlərin az təyin olunmasına cəhd göstərmək lazımdır”.

Onun fikrincə, bu gün millimiz müdafiə futbolu oynamamıdır: “Təkcə müdafiə olunacağıqsa, böyük problemlərlə üzləşə bilərik. Bəlkə də Berti Foqts tamamilə fərqli fikirləşir, komandanı müdafiədə oynatmaq istəyir. Ancaq hesab edirəm ki, yığmamız bu gün Şimali İrlandiyayla hücumda oynamaqla başa-baş mübarizə edə bilər”.