Mənzil almaq istəyən şəxslər bəzən evin pulunu tam ödəmək imkanına malik olmadıqda və ya satıcı ilə razılaşma əsasında mənzili müqavilə ilə əldə edirlər.
Lakin belə hallarda müqavilənin şərtləri, ödəniş qaydaları və mənzilin hüquqi statusu ilə bağlı diqqətdən kənarda qalan məqamlar sonradan ciddi problemlərə səbəb ola bilər.
AZXEBER.COM xəbər verir ki, mənzil alqı-satqısı zamanı ilk növbədə müqavilənin hüquqi qüvvəsi və tərəflərin öhdəlikləri diqqətlə yoxlanılmalıdır.
Mütəxəssislərin fikrincə, alıcı müqaviləni imzalamadan əvvəl mənzilin kimə məxsus olduğunu, üzərində hər hansı məhdudiyyət, ipoteka və ya həbsin olub-olmadığını araşdırmalıdır.
Bundan başqa, müqavilədə mənzilin dəqiq ünvanı, sahəsi, satış qiyməti, ödənişin hansı qaydada həyata keçiriləcəyi və ödənişlərin tarixləri aydın şəkildə göstərilməlidir.
Əgər mənzilin pulunun hissə-hissə ödənilməsi nəzərdə tutulursa, hər ödənişin məbləği və müddəti müqavilədə qeyd olunmalıdır. Alıcı etdiyi ödənişləri təsdiq edən sənədləri də saxlamalıdır.
Digər vacib məsələ isə müqavilənin hansı formada bağlanmasıdır. Tərəflər arasında sadə yazılı razılaşmanın olması hər zaman alıcının mənzil üzərində mülkiyyət hüququ əldə etməsi anlamına gəlmir. Bu səbəbdən sənədlərin hüquqi baxımdan düzgün rəsmiləşdirilməsi xüsusi əhəmiyyət daşıyır.
Həmçinin müqavilədə tərəflərdən birinin öhdəliyini yerinə yetirməməsi halında hansı məsuliyyətin yaranacağı, müqaviləyə xitam verilməsi və ödənilən pulun geri qaytarılması ilə bağlı şərtlərin dəqiq göstərilməsi vacibdir.
Mütəxəssislər hesab edirlər ki, mənzil alarkən yalnız satıcının verdiyi vədlərə güvənmək əvəzinə, bütün sənədlər əvvəlcədən yoxlanılmalıdır. Xüsusilə böyük məbləğdə ödəniş edilməzdən əvvəl müqavilənin hüquqşünas tərəfindən nəzərdən keçirilməsi gələcəkdə yarana biləcək mübahisələrin qarşısının alınmasına kömək edə bilər.
Fəridə Əsədzadə
