Xəbər verdiyimiz kimi, ötən gün baş tutan "Füzuli şəhər günü” münasibətilə təşkil olunan tədbirlər unudulmaz hadisələrlə yadda qalıb.
Tədbir zamanı Dövlət Başçısı İlham Əliyev bir çox sənət adamları ilə bir araya gəlib səmimi söhbət edib.
Prezidentlə görüşdə iştirak edən bəstəkar-müğənni Murad Arif yaşadığı hissləri özəl olaraq AZXEBER.COM-la bölüşüb:
"Bu möhtəşəm bir gün idi. Cənab Prezidenti canlı görmək, onun bu şanlı qələbəmizlə bağlı fikirlərini televiziyadan, radiodan, saytlardan deyil, canlı canlı dinləmək, onunla şəxsən tanış ola bilmək böyük bir sevincdir. Mən hesab edirəm ki, biz bu gün çox xoşbəxtik. Biz dedikdə - dünya azərbaycanlılarını, biz Qarabağlıları, Füzulililəri nəzərdə tuturam. Ölkəmizin ərazi bütövlüyünü təmin etməkdən vacib heç nə ola bilməz. Bir ölkənin bütün uğuru, nicatı yalnız bu həqiqətin üzərində dayanır. Bu günə qədər ümidlərimizə torpaqlarımızın işğal altında olması mane olurdu. Bundan sonra zənn edirəm ki, ölkəmizi yalnız gözəlliklər gözləyir.”
Murad Arif belə bir günü onlara yaşadan tədbirin bütün təşkilatçılarına təşəkkür etməyi də unutmayıb:
"Çox səmimi,mehriban bir ortam var idi. Düşünürəm ki, görüntülər də hər şeyi sübut edir. Çox sevinirəm ki, bu görüşü həyata keçirdilər. Öz adımdan və bütün həmkarlarım adından bu işdə əməyi olan Heydər Əliyev Fonduna və Mədəniyyət Nazirliyinə təşəkkürümü bildirirəm. Və əlbəttə ki, bu torpaqlara yenidən qayıtmaq, ora ayaq basmaq imkanını bizə verən Cənab Ali Baş Komandana təşəkkür edirəm.
Aysel Hacızadə
