“Müsavat Partiyası gələn il keçiriləcək I Avropa Olimpiya Oyunları ilə bağlı xaricdən xüsusi tapşırıqlar alıb. Həmin oyunları nüfuzdan salmaq istəyirlər və bu ərəfədə Azərbaycanda siyasi gərginlik yaratmağa istəyirlər”
Bu sözləri AZXEBER.COM-a millət vəkili Aydın Mirzəzadə Müsavat Partiyasının keçirdiyi mitinqi ilə bağlı mövqeyini açıqlayarkən söyləyib:
“Nə gözlənilirdisə, o da baş verdi. Günü-gündən sosial bazasnı itirən, daxili çəkişmələrdən bu gün tərəfdarları tərəfindən ciddi qüvvə olaraq qəbul edilməyən Müsavat Partiyası özünün iflasına möhür vurdu. Orta həcmli bir stadionu doldura bilməyən partiya göstərdi ki, bu gün Azərbaycan siyasətində hər hansı nüfuza, təsir imkanına malik deyil. Azərbaycanın müasir inkişaf problemlərinə dair hələ də bir proqram irəli sürməyib. Hələ də 20-25 il bundan əvvəlki proseslərin psixoloji təsiri altında qalan partiya heç bir zaman cəmiyyətin aparıcı qüvvəsi ola bilmədi. Müsavat Partiyasının irəli sürdüyü şüarlar, qaldırdığı məsələlər uydurmadır. Demokratik Azərbaycanda “siyasi məhbus” məsələsi ilə bağlı mitinq keçirən partiya faktiki olaraq öz əsil istəyini ortaya qoydu.
Müsavat Partiyası gələn il keçiriləcək I Avropa Olimpiya Oyunları ilə bağlı xaricdən xüsusi tapşırıqlar alıb. Həmin oyunları nüfuzdan salmaq istəyirlər və bu ərəfədə Azərbaycanda siyasi gərginlik yaratmağa çalışırlar. Bu da Ermənistanın istəyi ilə üst-üstə düşür. Radikal müxalifət ilk dəfə deyil ki, xarici qüvvələrin təsiri ilə Azərbaycanda önəmli hadisələrin baş verdiyi ərəfələrdə ölkədə gərginlik yaratmaq istəyirlər. Bir şeyi unutmamalıdırlar ki, Azərbaycan xalqı artıq müxalifətə dəstək vermir. Onların tərəfdarı deyillər.
Gələn il Azərbaycanda I Avropa Olimpiya Oyunları yüksək səviyyədə keçiriləcək və ölkəmiz beynəlxalq aləmdə ciddi nüfuza malik olan dövlət statusunu bir daha təsdiq edəcək”.
