“XX əsrin əvvəlində olduğu kimi, XXI əsrin əvvəlində də Azərbaycan azad və müstəqil ölkə olaraq siyasətini davam etmək uğrunda imtahan verir. Bu gün də Azərbaycana qoşun yeritmək, Azərbaycanın müstəqilliyinə xitam vermək üçün əlindən gələni əsirgəməyən qüvvələr mövcuddur”.

Bunu bir sıra müxalifət nümayəndələrinin Milli Şura adı altında birləşmək cəhdini şərh edən Milli Məclisin deputatı Ceyhun Osmanlı deyib.

Deputat bildirib ki, həmin qüvvələr yüz il əvvəl bolşeviklərdən istifadə edirdisə, bu gün vəzifə və biznes üçün hər şəyə hazır olanlardan bəhrələnir: “Təəssüf hissi ilə bildirirəm ki, bu insanlar üçün azadlıq sözü “saqqız” funksiyasını yerinə yetirir. Çünki onlar milli azadlığın fəlsəfəsindən xəbərsizdir və Milli Şura adı altında Şura hökumətini, azadlıq adı altında vassallığı təbliğ edirlər”.

Gənclərin yeni yaradılmaq istənilən Milli Şuranı tanımasına gəlincə isə Ceyhun Osmanlı bildirib ki, Azərbaycan gəncləri yalnız iki Milli Şura tanıyır: “Bunlardan biri 1918-ci ildə Azərbaycanın müstəqilliyi üçün çarpışan Milli Şura, digəri isə 1995-ci ildə yaradılmış Gənclər Təşkilatlarının Milli Şurasıdır. Müxalifət nümayəndələrindən xahiş edərdim ki, “Milli” sözünü ləkələməsinlər, özlərinə təzə ad tapsınlar”.

Gənclərin hansı siyasi çağırış istiqamətində hərəkət edəcəyi sualına isə Ceyhun Osmanlının cavabı belə olub: “Nə qədər ki İlham Əliyev siyasətdə olacaq, biz də hər zaman onunla olacağıq. Mən hal-hazırda Azərbaycan üçün daha milli, daha müdrik, daha təcrübəli və Azərbaycan müstəqilliyi və dövlətçiliyi naminə heç kimə güzəştə getməyəcək bir lider tanımıram”. /// APA