“YAP-ın qurultayının keçirilmə tarixinin “Milli Şura”ya görə irəli çəkilməsi fikri düzgün deyil”.

AZXEBER.COM-un məlumatına görə, “Azadlıq” qəzetinin bu günkü sayında YAP-ın avqustda keçirməyi planlaşdırdığı qurultayın tarixinin irəli çəkilməsi ilə bağlı bəzi məlumatlar dərc edilib. Qəzetin yazdığına görə, YAP-ın qurultayı avqust ayına nəzərdə tutulub, lakin bir neçə gün əvvəl bəlli olub ki, qurultayın vaxtı irəli çəkilib. Hakim partiya ali toplantısını iyunun 7-də keçirməyi planlaşdırır.

AZXEBER.COM məsələylə bağlı hakim Yeni Azərbaycan Partiyasının (YAP) üzvü, millət vəkili Aydın Mirzəzadənin münasibətini öyrənib. Millət vəkili qurultayın keçirilmə tarixinin dəyişdirilməsinin “Milli Şura” ilə heç bir əlaqəsinin olmadığını bildirib.

Onun fikrincə qurultayın irəli çəkilməsinin əsas səbəblərindən biri rayon təşkilatlarında bu konfransın keçirilmə proseslərinin yekunlaşmasıdır.

“YAP-ın qurultayının keçirilmə tarixinin Milli Şuraya görə irəli çəkilməsi düzgün fikir deyil. Bunlar bir-biri ilə əlaqəli olmayan məsələlərdir. Qurultay seçkiöncəsi keçirilməli idi, bu öncədən elan edilmişdir. O ki, qaldı onun keçirilmə tarixinə, bunun hansı tarixə təsadüf etməsinin heç bir fərqi yoxdur. Rayon təşkilatlarında bu konfrans keçirildikdən sonra qurultayın iyunda keçirilməsi qərara alındı ”.

Deputat“Milli Şura”nı müxalifətin növbəti uğursuz layihəsi kimi qiymətləndirib:

“O ki, qaldı “Milli Şura”nın fəaliyyətinə, demokratik ölkədə hər bir qrupun birlik yaratmaq hüququ var. Əvvəllər də olduğu kimi müxalifət bu dəfə də yeni bir qrum yaratmaqla, hər hansı bir uğur əldə edə bilməyəcək. Bu həmin adamlardır ki, 1995-ci ildə Demokratik Konqres, 2002-ci ildə Azadlıq, 2005-ci ildə Bizim Yol kimi yeni layihələr yaratdılar. Bunlar eyni adamlardır və vaxt aşırı yeni adlarda birliklər, şuralar yaradırlar. Ancaq ümumi götürdükdə bu dəfə də yaradılan şura uğursuz olacaq”.

Fatimə İbrahimova