"Dünyada baş verən müharibələr, terrorlar, gərginliklər hər birimizin gözünün önündə baş verir. Hər bir insan bunu görür, anlayır, analiz edir və eyni vaxta qayıdıb ölkəmizə baxanda stabilliyi görür”.
Bu sözləri AZXEBER.COM-a açıqlamasında Milli Məclisin deputatı Vüqar İskəndərov deyib.
Deputatın fikrincə, Azərbaycanda olan stabil həyat hər bir vətəndaşın ən qiymətli xəzinəsidir:
"Siyasi, iqtisadi, sosial, xalq-iqtidar birliyi, ondan doğan bu stabil həyat təbii ki, bizim ən qiymətli xəzinəmiz sayılmalıdır. O ölkədəki siyasi liderlər zəifdir, o cür ölkədəki xalq və lider arasında uçurum var, idarəetmə zəifdir, həmin ölkədə müxtəlif problemlər var və burada bəzi qüvvələr ölkəyə rəhbərlik edir. O cümlədən bu ölkələr stabillikdən çıxır, xaosa sürüklənir, burada dövlətçilikdən əsər-əlamət qalmır”.
Millət vəkili bildirib ki, Azərbaycan 44 günlük Vətən Müharibəsindən sonra da müxtəlif təzyiqlərə və təhdidlərə məruz qalıb:
"Azərbaycan da Vətən Müharibəsində qələbə qazandıqdan sonra dünyanın ən qürurlu, müzəffər xalqı və dövləti olandan sonra üzərimizə yalnız erməni sevdalıları yox, digər qüvvələr də gəlməyə başladılar.
Azərbaycan Prezidentinin qətiyyəti, ağlı, bacarığı, siyasi qroysmeyster ustalığı bütün bu təhdidlərin qarşısını yüksək səviyyədə almış oldu. Hətta böyük dövlətlərin belə Azərbaycanla bağlı şantaj dilində danışmasına icazə verilmir.
Əksinə, həmin dövlətlərin üzərinə gedilir, onların siyasətindəki eybəcərliklər həm üzlərinə, həm də dünyaya çatdırılır. Bunu artıq heç nə ilə Azərbaycanın boynuna ata bilməyən qüvvələr, Azərbaycandakı proksi qüvvələrdən, yemlədikləri və hər an xainliyə hazır olan bir neçə nəfərdən istifadə etmək üçün düyməni basırlar”.
Deputat hesab edir ki, müxalifətin 21 apreldə aksiya təyin etməsi gülünc və təəssüf doğurucu məqamdır:
"Milli Şura dediyimiz dağıdıcı müxalifətin yığıldığı bir neçə nəfər - Əli Kərimli və onun dəstəsinin 21 apreldə mitinq təyin etməsi, buradakı absurd tələblər yalnız gülüş və təəssüf doğurur. Çünki 30 il keçməsinə baxmayaraq hələ də bu şəxslər dəyişmək istəmirlər.
Hələ də onlar anlaya bilmirlər ki, dünya başqa cür idarə olunur, tamamilə ayrı inkişaf edir. Onlar isə hələ 80 və 90-cı illərdə ilişib qalıblar və oradan da çıxa bilmirlər. Bu bataqlığa düşmüş kəslər düşünmürlər ki, qeyri-stabil görmək istədikləri Azərbaycanda onlar və yaxınları da yaşayır.
Hər hansı bir problem yaranarsa, heç kim bundan sığortalanmayacaq. Bu düşüncə hələ də onlara çatmayıbsa, demək ki, yaşlı-başlı adamlar olublarsa və anlamırlarsa, bundan sonra onlardan heç nə gözləmək olmaz. Dünyanın bir yanar oda çevrilməsi fonunda hətta qonşuluğumuzdakı baş verən hadisələr, həmin kontekstdən baxanda ölkəmizdəki bu sabitlik adası, stabillik müxalifətçiləri də narahat etməyə başlayıb. Biz nə desək də, nə etsək də onlar bu ölkəyə düşmən kəsiliblər. Onların hazırda suyu bulandırmaq cəhdləri öz başlarında çatlayacaq”.
Millət vəkili əlavə edib ki, müxalifətin mitinq təşkil etməsi onların bir daha sifarişlə işləməsinin nəticəsidir:
"Əvvəla həmin o qoyduqları tələblər absurddur, heç bir əsası yoxdur. Nə iqtisadi, nə də siyasi problemlərlə bağlı indiki halda hər hansı bir ajiotaja ehtiyac yoxdur. Bu kiçik stəkanda fırtına qoparmaq cəhdidir. Yalnız özlərini gülünc vəziyyətə qoyurlar. Çünki onların dedikləri məsələləri, eyni zamanda sosial və siyasi sifarişi indiki halda mövcud deyil.
Demək ki, onlar yalnız siyasi sifarişləri yerinə yetirdiklərini göstərirlər. "Beşinci kolon” olmaq arzusu insanların iliyinə işləyib və yeri gəldi-gəlmədi bundan istifadə etməyə çalışırlar.
Təkrar edirik ki, bunların heç bir əsası yoxdur. İndiki situasiyada dağıdıcı müxalifət belə ideyalardan, fikirlərdən əl çəkməlidir. Dövlətin hərtərəfli inkişafında, onun qorunmasında, stabilliyində siyasi baxışından asılı olmayaraq hamı maraqlı olmalıdır”.
Mikayıl Mirzəzadə
