Naftalan Şəhər İcra Hakimiyyətinin təşkilatçılığı ilə Aprel döyüşləri zamanı şəhid olmuş mayor Vaqif Bayramovun xatirəsinə həsr edilmiş anım tədbiri keçirilib.
AZXEBER.COM xəbər verir ki, tədbirdə Naftalan ŞİHB-nın müavini, məsul əməkdaşları, şəhid ailələri, təhsil işçiləri, ictimaiyyət nümayəndələri, şəhidin ailə üzvləri iştirak edib.
İştirakçılar ilk olaraq şəhid mayor Vaqif Bayramovun məzarını ziyarət edib, xatirəsini ehtiramla yad ediblər.
Tədbir şəhidin təhsil aldığı şəhər İ.Nəsimi adına 1 nömrəli tam orta məktəbdə "Aprel döyüşlərindən başlayan Zəfər" adlı ədəbi-bədii proqramla davam etdirilib. Dövlət Himni səsləndirilib, Şəhidlərin xatirəsi bir dəqiqəlik sükutla yad edilib.
Tədbirdə çıxış edənlər Aprel döyüşlərinin Azərbaycan tarixi üçün önəmini vurğulayaraq, bu qələbənin xalqımızın qətiyyətini, ordumuzun gücünü və dövlətimizin sarsılmaz iradəsini nümayiş etdirdiyini bildiriblər. Qeyd olunub ki, Aprel döyüşləri işğal olunmuş torpaqların azad olunması yolunda ilk real addım, Vətən müharibəsində əldə edilən Zəfərin başlanğıcı olub.
Şəhidin ailə üzvləri çıxış edərək, onlara və bütövlükdə bütün şəhid ailələrinə göstərilən hərtərəfli diqqət və qayğıya görə ölkə rəhbərinə minnətdarlıqlarını ifadə ediblər.
Şəhid mayor Vaqif Dilqəm oğlu Bayramov ölümündən sonra Azərbaycan Respublikası Prezidentinin Sərəncamı ilə 3-cü dərəcəli "Vətənə xidmətə görə” ordeni ilə təltif olunub.
Qeyd edək ki, Vaqif Bayramovun qardaşı Mehman Bayramov Birinci Qarabağ müharibəsində şəhid olub.
