Xəbər verdiyimiz kimi, Prezident Administrasiyası tərəfindən Milli Məclis Aparatının, Mərkəzi Seçki Komissiyasının, Hesablama Palatasının, Ədliyyə və Maliyyə nazirliklərinin, habelə 25 siyasi partiyanın nümayəndələrinin iştirakı ilə görüş təşkil olunub.
Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin rəhbərliyi ilə keçirilən bu görüşdə marağa səbəb olan məqamlardan biri də əsas müxalifət partiyalarından olan Müsavatın iştirakıdır.
Qeyd edək ki, sosial şəbəkələrdə Müsavat Partiyası təmsilçisinin hakimiyyət nümayəndəsi ilə bir masaya oturması müzakirələrə səbəb olub.
YAP-çı deputat Naqif Həmzəyev Gununsesi.info-ya açıqlamasında PA-nın təşkil etdiyi bu görüş haqqında danışıb.
Azərbaycanın demokratik dövlət olduğunu vurğulayan Həmzəyev bildirib ki, siyasi qüvvələrin ölkə həyatındakı rolu danılmazdır: "Bu baxımdan hesab edirəm ki, zaman-zaman müxtəlif məsələlərlə bağlı mərkəzi hakimiyyət, qanunvericilik orqanlarının təmsilçiləri ilə siyasi partiya rəhbərlərinin bir araya gəlməsi təqdirəlayiq haldır. Sevindirici haldır ki, Azərbaycanın siyasi kəsimində münasibətlər ümumumilli məsələlərdə həmrəyliyə, ölkəmizin daha da güclənməsinə yönəlik prinsiplərə söykənir. Təbii ki, bu cür görüşlərdə cəmiyyəti narahat edən bir sıra məsələlər də müzakirə olunur və müyyən təkliflər səslənir ki, bu da ölkənin və cəmiyyətin inkişafı üçün mühüm amildir”.
Azərbaycan cəmiyyətinin monolit bir cəmiyyət olduğunu vurğulayan deputat buna bariz nümunə kimi 44 Günlük Vətən Müharibəsini misal çəkib: "Azərbaycan xalqının ali baş komandanın dəmir yumruğu altında birləşməsi, ümumilli həmrəylik bizim qələbəmizi asanlaşdırdı. Hesab edirəm ki, bu birlik gələcəkdə də davam etdirilməlidir. Biz baxmayaraq ki, suverenliyimizi bərpa etmişik, amma güclənməyimizi istəməyən ölkələr yenə də var. Bu ölkələr çalışır ki, Azərbaycanın daxilində düşmənçilik toxumu səpilsin, qarşıdurmalar yaransın. Ona görə də müxtəlif ideologiyalara qulluq etsəllər də belə cəmiyyətin siyasi kəsimini təmsil edən qüvvələrin zaman-zaman bir araya gəlməsi vacibdir”.
Müsavat Partiyasına bu görüşə qatıldığı üçün ünvanlanan tənqidlərə gəlincə, YAP-çı deputat bildirir ki, Müsavat doğru olanı etdi: "Əgər hər hansı bir siyasi qüvvə özünü cəmiyyətin, dövlətin inkişafı prosesində görürsə, bu cür təşəbbüslərə biganə qalmamalıdır. Bu baxımdan hesab edirəm ki, Müsavat Partiyası doğru olanı edib”.
