Milli Məclisin AŞPA nümayəndə heyətinin və Qazaxıstan dostluq qrupunun üzvü Naqif Həmzəyev "Prezidentlik İnstitutu: Qazaxıstan modeli” mövzusunda keçiriləcək beynəlxalq parlament konfransda iştirak etmək üçün noyabrın 26-da Qazaxıstanın paytaxtı Nur-Sultan şəhərinə səfər edəcək.
AZXEBER.COM xəbər verir ki, deputat Naqif Həmzəyev tədbir çərçivəsində "Gənclərin dəyəri və parlament həmrəyliyi” mövzusunda Türk dünyası gənc parlamentarilərinin birinci toplantısında iştirak edəcək. Tədbirin əsas məqsədlərindən biri TÜRK PA çərçivəsində gənc parlamentarilərin mütəmadi əməkdaşlıq platformasına dair fikir mübadiləsi aparmaqdır.
Qeyd edək ki, 2019-cu ilin oktyabr ayında Bakıda Azərbaycan Respublikasının Prezidenti İlham Əliyevin sədrliyi ilə Türkdilli Dövlətlərin Əməkdaşlıq Şurasının VII Zirvə Görüşü keçirilib. Türkdilli ölkələrin birliyini və sarsılmaz ittifaqını bir daha nümayiş etdirən beynəlxalq tədbir sülhün, sabitliyin və regionda təhlükəsizliyin təmin olunmasına xidmət edib. Türk dünyası gənc parlamentarilərin 1-ci toplantısı Qazaxıstanın birinci Prezidenti və Türk Şurasının fəxri sədri Nursultan Nazarbayevin təşəbbüsü ilə Qazaxıstanın paytaxtı Nur-Sultan şəhərində keçirilir.
