27 may 2025-ci il tarixində Naxçıvan Təlim Mərkəzinin təşkilatçılığı ilə "İnsan Resurslarının İdarə Edilməsi” mövzusunda uzunmüddətli təlim proqramına start verildi.
AZXEBER.COM xəbər verir ki, altı həftə davam edəcək bu proqram çərçivəsində iştirakçılara insan resurslarının strateji planlaşdırılması, işə qəbul və yerləşdirmə, performansın qiymətləndirilməsi, motivasiya metodları, peşəkar inkişaf və əmək münasibətlərinin səmərəli idarə olunması istiqamətində əhatəli və praktik biliklər təqdim olunacaq.
Təlimdə birinci mərhələdə Naxçıvan Muxtar Respublikasının 13 müxtəlif dövlət qurumunu təmsil edən 18 əməkdaş iştirak edir. Təlimin ilk günündə iştirakçıların mövzuya dair ilkin biliklərini ölçmək məqsədilə sınaq imtahanı keçirilib. Bu metodika, təlim prosesində fərdi və ümumi inkişafın daha effektiv şəkildə qiymətləndirilməsinə imkan yaradacaq.
Qrup işləri, real həyat nümunələri (case study) və interaktiv sessiyalarla zənginləşdirilmiş bu təlim proqramı, insan resursları sahəsində çalışan dövlət qulluqçularının nəzəri biliklərini praktik bacarıqlarla tamamlayaraq, onların iş mühitində daha səmərəli fəaliyyət göstərmələrinə xidmət edəcək.
Naxçıvan Təlim Mərkəzi tərəfindən həyata keçirilən bu təşəbbüs, dövlət idarəçiliyində müasir insan resursları idarəetmə mexanizmlərinin tətbiqinə və kadr potensialının daha səmərəli formada inkişaf etdirilməsinə mühüm töhfə verməyi hədəfləyir.
