Rusiyada "Google", "Telegram" və "Pinterest" qadağan olunmuş məzmunları silmədikləri üçün ümumilikdə 22,8 milyon rubl cərimələnib.
AZXEBER.COM xarici mətbuata istinadən xəbər verir ki, Moskvanın Taqanski Rayon Məhkəməsi şirkətlərə qarşı açılan inzibati işlər üzrə qərar qəbul edib.
Qərara əsasən, Telegram üç ayrı pozuntuya görə 11,4 milyon rubl, Google iki pozuntuya görə 7,6 milyon rubl, Pinterest isə 3,8 milyon rubl cərimə ödəyəcək.
Pinterest barəsində əlavə olaraq ekstremist fəaliyyətə çağırışlar və uşaqlara aid qadağan olunmuş məzmunların silinməməsi ilə bağlı inzibati iş başlanıb. Şirkət bu iş üzrə 8 milyon rubla qədər əlavə cərimə ilə üzləşə bilər.
Qeyd edək ki, Rusiyada xarici internet platformalarına qarşı bu cür sanksiyalar daha əvvəl də tətbiq olunub.
Google-a 2021-ci ilin sonundan etibarən dövriyyəsi əsasında tətbiq edilən cərimələrin ümumi məbləğinin 29 milyard rubldan çox olduğu bildirilir. Şirkətin Rusiyadakı icra borcunun isə 20 milyard rubldan artıq olduğu qeyd edilir.
Gülay
