İsrail Baş naziri Binyamin Netanyahu və ABŞ dövlət katibi Marko Rubio telefon danışığında Yaxın Şərqdəki vəziyyəti, o cümlədən Qəzza zolağında saxlanılan girovların vəziyyətini müzakirə ediblər.
"Report” xəbər verir ki, bu barədə yəhudi dövlətinin hökumət başçısının dəftərxanası məlumat yayıb.
"Tərəflər regiondakı son hadisələri, o cümlədən girovların azad edilməsi və Qəzza zolağında döyüş əməliyyatlarının yenidən başlanması məsələlərini müzakirə ediblər. Dövlət katibi Rubio Birləşmiş Ştatların İsrailə və onun gerçəkləşdirdiyi siyasətə tam və qeyd-şərtsiz dəstəyini ifadə edib”, – bəyanatda deyilib.
Xatırladaq ki, martın 18-də İsrail ordusu Qəzzada döyüş əməliyyatlarını bərpa edərək anklavı kütləvi hava zərbələrinə məruz qoyub.
Netanyahunun dəftərxanası bunu HƏMAS-ın vasitəçilər və ABŞ Prezidentinin xüsusi elçisi Stiven Uitkoffun danışıqlarda irəli sürdüyü təklifləri rədd etməsi ilə izah edib və əlavə edib ki, sektordakı əməliyyatın məqsədi bütün girovların azad edilməsidir.
