Niyə bəzi insanlar həmişə gecikir? - Maraqlı səbəb » Azxeber.com Azərbaycanda özəl xəbərlər, araşdırmalar, təhlillər və müsahibələrin tək ünvanı

Niyə bəzi insanlar həmişə gecikir? - Maraqlı səbəb

SOSİAL

00:13 25.07.2026

941

Kimisi görüşə, işə və ya tədbirə hər zaman vaxtında gəlir, kimisi isə nə qədər çalışsa da, həmişə gecikir. Maraqlıdır ki, bu vərdiş hər zaman məsuliyyətsizlik və ya başqalarına hörmətsizlikdən qaynaqlanmır. Psixoloqların fikrincə, davamlı gecikmənin arxasında insanın şəxsiyyət xüsusiyyətləri, düşüncə tərzi və gündəlik davranış vərdişləri dayanır.

AZXEBER.COM Metbuat.az-a istinadən xəbər verir ki, bunun başlıca səbəbi bəzi insanların vaxtı olduğundan daha geniş qiymətləndirirməsidir. Onlar müəyyən işi başa çatdırmaq üçün lazım olan müddəti olduğundan qısa hesab edir və nəticədə planlaşdırdıqları saatdan gec çıxırlar. Psixologiyada bu hal bəzən "planlaşdırma yanlışığı” kimi izah edilir. İnsan beyni gələcək tapşırıqların daha tez tamamlanacağını düşünməyə meylli olur.

Davamlı gecikən insanların bir qismi isə eyni anda çox iş görməyə çalışır. Evdən çıxmazdan əvvəl əlavə bir elektron məktuba cavab vermək, otağı yığışdırmaq və ya qısa telefon danışığı etmək istəyirlər. Hər biri cəmi bir neçə dəqiqə çəksə də, bu kiçik gecikmələr üst-üstə yığıldıqda nəzərdə tutulan vaxtı aşır.

Psixoloqların fikrincə, bəzən gecikmə stres və narahatlıq hissi ilə də bağlı olur. Məsuliyyətli görüş və ya vacib təqdimat öncəsi yaranan gərginlik bəzi insanlarda qərar verməyi ləngidir. Nəticədə onlar evdən çıxmağı gecikdirir və vaxt itkisi yaşayırlar.

Şəxsiyyət xüsusiyyətləri də bu davranışa təsir edir. Məsələn, spontan qərarlar verməyi sevən, planlardan çox anın axarına uyğun hərəkət edən insanlar vaxt cədvəlinə riayət etməkdə daha çox çətinlik çəkirlər. Digər tərəfdən, yüksək intizamlı və planlı insanlar adətən vaxtı daha dəqiq idarə edə bilirlər.

Mütəxəssislər bildirirlər ki, davamlı gecikmək iş həyatında və şəxsi münasibətlərdə etibarın azalmasına səbəb ola bilər. Qarşı tərəf bunu məsuliyyətsizlik və ya hörmətsizlik kimi qəbul edə bilər. Halbuki, gecikən insanın niyyəti çox vaxt bu olmur.

Psixoloqlar bu vərdişi dəyişməyin mümkün olduğunu deyirlər. Bunun üçün görüşlərə hazırlaşarkən yol ehtimalını, tıxac riskini və digər gözlənilməz halları nəzərə alaraq ən azı 10-15 dəqiqə əlavə vaxt planlaşdırmaq tövsiyə edilir. Gün ərzində görüləcək işləri prioritetləşdirmək, telefonda xatırlatmalardan istifadə etmək və evdən çıxış saatını əvvəlcədən müəyyənləşdirmək də faydalı üsullar hesab olunur.