Bəzi insanlar pulun, xüsusilə də yeni əskinasların özünəməxsus qoxusunu xoşlayır.
Kağız pulun qoxusu bəzən insanlarda maraq və xoş hiss yaradır. Bəs əskinasların özünəməxsus qoxusu haradan gəlir və niyə bəzi insanlar bu qoxunu digərlərindən daha çox sevir?
AZXEBER.COM xəbər verir ki, pulun qoxusu təkcə kağızın özündən yaranmır. Əskinasların hazırlanmasında istifadə olunan kağız və ya polimer material, mürəkkəb, qoruyucu örtüklər və digər kimyəvi komponentlər onun qoxusunun formalaşmasında rol oynayır.
Pulun özünəməxsus qoxusu haradan gəlir?
Yeni əskinaslarda hiss olunan qoxunun əsas mənbələrindən biri onların hazırlanmasında istifadə edilən materiallardır. Xüsusilə mürəkkəblər və kağızın tərkibində olan müxtəlif uçucu birləşmələr havaya yayıldıqda insan tərəfindən qoxu kimi qəbul edilir.
Elmi araşdırmalarda ABŞ dolları əskinaslarının qoxusu analiz edilib və onların tərkibində müxtəlif uçucu üzvi birləşmələr müəyyən olunub. Bu maddələrin bir hissəsi mürəkkəb və əskinasın hazırlanmasında istifadə olunan digər materiallarla əlaqələndirilib.
Niyə bəzi insanlar pul qoxusunu sevir?
İnsanların qoxulara münasibəti eyni olmur. Bir insana xoş gələn qoxu başqa biri üçün tamamilə adi və ya xoşagəlməz ola bilər.
Bunun əsas səbəblərindən biri qoxuların yaddaş və emosiyalarla sıx əlaqəsidir. İnsan müəyyən qoxunu əvvəllər yaşadığı müsbət hadisələrlə əlaqələndiribsə, həmin qoxunu sonradan da xoş qəbul edə bilər. Pul qoxusu da bəzi insanlarda maddi rahatlıq, alış-veriş, yeni əşyalar və ya uşaqlıqdan qalan müəyyən xatirələrlə assosiasiya yarada bilər.
Yeni pul niyə daha fərqli qoxur?
Yeni çap edilmiş və dövriyyəyə az çıxmış əskinasların qoxusu daha nəzərəçarpan ola bilər. Bunun səbəbi onların üzərindəki mürəkkəb, kağız və digər istehsal komponentlərindən ayrılan uçucu maddələrin hələ tam dağılmamasıdır.
Dövriyyədə olan pulların qoxusu isə zaman keçdikcə dəyişir. Əskinaslar insanların əllərindən, pul kisələrindən, çantalardan və müxtəlif səthlərdən keçdiyi üçün onların üzərində əlavə maddələr toplanır.
Fəridə Əsədzadə
