Xəbər verildiyi kimi, Ermənistan mediası Azərbaycanda həbsdə olan Qarabağdakı qondarma rejimin "baş nazir”i Ruben Vardanyanın Nobel sülh mükafatına namizəd olması ilə bağlı xəbərlər tirajlamışdı.
Yayılan məlumatda bildirilirdi: ""Avrora” humanitar təşəbbüsünün həmtəsisçisi Ruben Vardanyan bir qrup ictimai və siyasi xadim, o cümlədən Nobel mükafatı laureatı tərəfindən 2024-cü il Nobel Sülh Mükafatına namizəd göstərilib”.
Bəs, Ermənistan mətbuatının iddiası nə dərəcədə həqiqətə uyğundur?
Bizim.Media mövzu ilə bağlı Norveç Nobel İnstitutuna sorğu göndərib. İnstitutdan sorğumuza cavab olaraq bildirilib:
"Mükafatın verilməsi üçün daxil olmuş təkliflər, mükafatın verilməsi ilə bağlı araşdırmalar və rəylər 50 il keçənədək açıqlana bilməz. Nobel Komitəsi namizədlərin adlarını özü açıqlamır, nə mediaya, nə də namizədlərin özünə. Bəzi hallarda namizədlərin adları mediada yer alır. Bu ya sırf qabaqcıl fərziyyələrin məhsuludur, ya da namizədliyin arxasında duran şəxs və ya şəxslər tərəfindən yayılan məlumatdır”, - deyə sorğuya cavab olaraq bildirilib.
Qeyd edilən cavab onu deməyə əsas verir ki, Ruben Vardanyanın Nobel mükafatına namizəd olması kimlərinsə fərziyyəsindən və ya iddiasından başqa bir şey deyil.
Yəni istənilən şəxs kiminsə Nobel Sülh Mükafatına "namizəd” olması ilə bağlı açıqlama verə, heç bir əsası olmadan təklif irəli sürə bilər. Lakin bu cür iddialar heç bir halda həmin şəxsin namizəd olacağını deməyə əsas vermir. Eynilə Vardanyan nümunəsində olduğu kimi…
