"Orada keçirilən mitinq Azərbaycan suverenliyinə dəstəkdir" - Deputat

"Onlara silah təchizatından başlamış təlimlərə qədər bütün addımlarını atdılar. Azərbaycanın suverenliyinə təhdid törədən ən müxtəlif təxribatların müəllifi kimi çıxış etdilər. Bunun qarşısını almaq üçün Azərbaycanın qəhrəman Silahlı Qüvvələri lazımı addımları atdı. Hətta Qarabağda yaşayan quldur erməni dəstələrinin fəaliyyətini gücləndirmək, onların revanşist hərəkətlərini həvəsləndirmək üçün sözün həqiqi mənasında "sülhməramlı" qüvvələrin missiyasından kənar Rusiyanın niyyətlərini həyata keçirən hərbi dəstə kimi özlərini ifadə etdilər”.

Deputat qeyd edib ki, bu məsələlərdən sonra Azərbaycan dövləti konkret addım atmağa məcbur qaldı:

"Bu gün o davam olunmaqdadır. Laçın humanitar yolundan Azərbaycana düşmən kəsilən ayrı-ayrı siyasətçilər Xankəndinə ardı-arası kəsilmədən səfərlər etdilər. Hətta İrandan silah-sursat daşındı. Bu yaxınlarda İranın 27 nəfər diversantı "sülhməramlılar"ın birbaşa himayəsi altında Xankəndidə İranın göndərmiş olduğu silahlardan istifadə üçün erməniləri təlimatlandırmağa başladı. Nəhayət, Azərbaycanın yeraltı sərvətlərini vəhşicəsinə talan edib, onu bazara çıxararaq silah alıb yenidən həm Ermənistanı, həm də separatçıları silahlandırmaq kimi bir missiyanın himayəçisi oldular. Azərbaycan dövləti də konkret addım atmağa məcbur qaldı və bəlli olduğu kimi müvafiq qurumlar talan edilən və böyük ekoloji terror törədilən ərazimizdə monitorinq keçirmək məqsədilə ermənilərin yaşadığı ərazidə canişin funksiyasını yerinə yetirən Volkovla danışıq apardılar. Onun da razılıq verməyinə baxmayaraq, dünən oraya gedən bizim yüksək səviyyəli mütəxəssislərimizin qarşısını kəsdilər. Arxalarında da bir-iki əsgər mundiri geyinən erməniləri və 5-10 nəfər başıpozuq adamların görüntüləri yayıldı. Azərbaycanın ərazisinə Azərbaycanın rəsmi qurumlarını buraxmıadılar. Bu artıq qırmızı xəttin tam keçilməsi idi və həqiqətən Rusiyanın tamamilə Azərbaycana qarşı qeyri-səmimi konkret münasibətinin göstəricisi idi”.

F.Ağamalı həmin qüvvələrin sülhməramlı deyil, erməniməramlı olduğunu deyib:

"Volkov və onu himayə edən, ona təlimat verən Rusiyanın hərbi-siyasi rəhbərliyinin maskası yırtıldı. Bəlli oldu ki, bunlar sülhməramlı deyil. Bunlar erməniməramlıdır. Erməninin yanında olan, erməniyanlı olan hərbi qüvvələrdir. Nəhayət, ötən gün bir sıra QHT təmsilçiləri həmin əraziyə getdi və orada etiraz mitinqinə start verdi. Çox haqlı olaraq həm də Xankəndi-Gorus yolunu bağladı. Giriş-çıxışın vətənpərvər övladlarımız tərəfindən qarşısı kəsildi. Orada keçirilən mitinq Azərbaycan suverenliyinə dəstəkdir. Onlar erməniyanlı Rusiyanın qüvvələrinə isə dinc etiraz aksiyası etdilər. Bu aksiya sona qədər getməlidir. Biz də xüsusi Bəyanat yaydıq, vətənpərvər soydaşlarımıza haqq qazandırdıq. Ehtiyac olarsa, partiyamızın çoxsaylı üzvlərilə də bu aksiyada iştiraka hazır olduğumuzu önə çəkdik. Nəhayət, "Azərişıq ASC”nin Rusiyanın "sülhməramlı" dəstələrinin nəzarət etdiyi ərazidə Azərbaycan bayrağının qaldırılması çox ciddi bir hadisə kimi tarixə düşdü. Bu, xalqımızın dinc yolla öz bayrağını məhz Xankəndinin beş metrliyində qaldırması vətənpərvərliyin və cəsarətin ciddi nümunəsidir”. 

"Rusiya "sülhməramlılar"ının nəzarətində olan Laçın-Şuşa yolunun bir hissəsində azərbaycanlı aktivistlər və ekologiya üzrə qeyri-hökumət təşkilatlarının (QHT) üzvləri "Ekoloji terrora son” şüarı altında etiraz aksiyası keçirirlər. Aksiyaçılar Rusiya "sülhməramlı" kontingentinin komandanı, general-mayor Andrey Volkovun əraziyə gəlişini tələb edirlər. Aksiya keçirilən əraziyə rus "sülhməramlılar"a dəstək üçün əlavə qüvvə cəlb edilib. Əvvəlcə onu qeyd edim ki, Laçın-Şuşa yolunda keçirilən etiraz aksiyaları dinc xarakterlidir və heç bir gərginlik ehtiva etmir. Azərbaycanlıların etiraz aksiyaları keçirməsinə başlıca səbəb "sülhməramlılar"ın müvəqqəti məsuliyyət zonasında yarıtmaz fəaliyyətidir”.

"Məsələ ondadır ki, Azərbaycan ərazilərinin 30 il ərzində Ermənistan tərəfindən işğal altında olduğu dövrdə Qarabağ və Şərqi Zəngəzur iqtisadi rayonlarında ölkəmizə qarşı ekoloji terror törədilib, bir çox faydalı qazıntı yataqları qanunsuz şəkildə istismar edilib. 44 günlük Vətən müharibəsindən sonra işğaldan azad edilən ərazilərdə uzun illər qanunsuz istismar və talan edilən yataqların bir çoxunda ekoloji vəziyyət nəzarət altına alınsa da, Rusiya Federasiyasının sülhməramlı kontingentinin müvəqqəti yerləşdirildiyi Azərbaycan ərazilərində olan Qızılbulaq qızıl və Dəmirli mis-molibden yataqlarında qeyri-qanuni istismar davam etməkdədir”. 

Politoloq qeyd edib ki, ilin sonlarınadək erməni silahlılarının terror təxribatları və qanunsuz fəaliyyət sonlanmasa, rəsmi Bakı daha ciddi addımlar ata bilər:

"Aydın məsələdir ki, rəsmi Bakı nə torpaqlarımızın istismarına, nə də Rusiya sülhməramlılarının bu qanunsuz əmələ göz yummasına icazə verəcək. Bunun üçün Azərbaycan tərəfi iki ciddi addım atdı. Birincisi, 10 dekabr tarixində faydalı qazıntıların qanunsuz istismar olunduğu əraziyə Azərbaycan nümayəndələrinin səfər etmək cəhdinə maneə törədilməsinə etiraz olaraq Azərbaycan Xarici İşlər Nazirliyi Rusiyaya nota təqdim etdi.

İkincisi, Laçın-Şuşa yolunun bir hissəsində azərbaycanlı aktivistlər və ekologiya üzrə qeyri-hökumət təşkilatları etiraz aksiyaları təşkil etdi.

Bu, rəsmi Bakının son yumşaq xəbərdarlığıdır. İlin sonlarınadək erməni silahlılarının terror təxribatları və qanunsuz fəaliyyət sonlanmasa, rəsmi Bakı daha ciddi addımlar ata bilər. Söhbət "Qisas” əməliyyatı və ya bu ilin mart ayında təşkil edilən Fərrux əməliyyatına bənzər növbəti prosesin icrasından gedir. Mövcud vəziyyət dəyişməyəcəyi təqdirdə 2023-cü ildə də bənzər formada hərbi əməliyyatların keçirilməsi mümkündür”.