Sentyabrın 11-də Prezident Administrasiyasının şöbə müdiri Ədalət Vəliyev ilə politoloq, Siyasi elmlər üzrə fəlsəfə doktoru, Beynəlxalq Münasibətlərin Araşdırılması Mərkəzinin rəhbəri, Prezident yanında Qeyri-Hökumət Təşkilatlarına (QHT) Dövlət Dəstəyi Şurasının üzvü Rufiz Qonaqov arasında görüş keçirilib.
AZXEBER.COM-un xəbərinə görə, görüşdə ölkədə aparılan islahatlar, yeni siyasi konfiqurasiyanın formalaşması, iqtidar-müxalifət siyasi dialoqunun uğurla həyata keçirilməsi və digər ictimai-siyasi proseslər ətrafında fikir mübadiləsi aparılıb.
Son 5 ay ərzində 10 siyasi partiyanın qurultaylarının keçirilməsi və təsis sənədlərində edilmiş dəyişikliklərin dövlət qeydiyyatına alınması, həmçinin 6 yeni siyasi partiyanın dövlət qeydiyyatına alınması və bu xüsusda Milli Məclisdə təmsil olunan siyasi partiyaların sayının 9-dan 11-ə yüksəlməsi, eyni zamanda, müstəqillik dövründə ilk dəfə Azərbaycan Respublikasının Milli Məclisi sədrinin vəzifəsində qadının, sədr müavini vəzifələrinin birinə isə müxalif partiyanın nümayəndəsinin seçilməsi, bundan əlavə bütün müxalif siyasi partiyaların Milli Məclis komitələrinin rəhbərliyində təmsil olunması faktları ölkənin siyasi həyatında xüsusi önəm kəsb etdiyi qeyd olunub.
Görüş zamanı, Azərbaycan Respublikasının Prezidenti İlham Əliyevin ölkənin müxalifət partiyalarının liderlərini və ictimai-siyasi xadimləri Novruz bayramı, 28 may Müstəqillik günü və Qurban bayramı münasibəti ilə təbrik etməsi iqtidar-müxalifət münasibətlərində yeni mərhələnin başlanmasının əyani sübutu olduğu vurğulanıb.
Eyni zamanda REAL partiyasının sədri İlqar Məmmədova və Rəsul Cəfərova bəraət verilməsi və maddi təzminatın ödənilməsi müsbət hal olaraq qeyd edilib.
Bununla yanaşı, son vaxtlar ölkədə rüşvətxorluğa və digər korrupsiya hallarına qarşı mübarizə istiqamətində görülən işlər və bu çərçivədə dövlət orqanlarında yüksək vəzifəli şəxslərin cinayət məsuliyyətinə cəlb edilməsi faktları yüksək qiymətləndirilib.
Həmçinin "Siyasi partiyalar haqqında” Qanuna dəyişiklərin edilməsi zərurəti, qanunlara riayət edilməsinə nəzarət mexanizmlərinin gücləndirilməsi və siyasi partiyaların maliyyə hesabatlılığı məsələləri barədə müzakirə aparılıb.
Bundan əlavə, Azərbaycanda COVİD-19 infeksiyasının yayılmasının qarşısının alınması məqsədilə bilavasitə ölkə Prezidenti İlham Əliyevin rəhbərliyi altında həyata keçirilən qabaqlayıcı tədbirlər, pandemiya dövründə Azərbaycan iqtisadiyyatının dayanıqlılığı nəticəsində sosial layihələrin təxirə salınmadan həyata keçirilməsi, vətəndaşların sosial rifahının yaxşılaşdırılması istiqamətində görülən işlər, infeksiyaya yoluxmuş siyasi partiya rəhbərləri və sıravi üzvlərinin xəstəxanalara yerləşdirilməsində köməklik göstərilməsi və onların vəziyyətinin nəzarətdə saxlanılması bir daha ölkə rəhbərinin hər bir vətəndaşa olan qayğısının və Prezident İlham Əliyevin hər bir vətəndaşın prezidenti olduğunun göstəricisi kimi dəyərləndirilib.
Vətəndaş cəmiyyətinin önəmli hissəsi olan, QHT və siyasi partiyaların ölkədə həyata keçirilən islahatlara dəstək verilməsində, xüsusilə dövlət qurumlarının fəaliyyətinə ictimai nəzarətdə fəal iştirak etmələrinin vacibliyi vurğulanıb.
Bununla yanaşı siyasi partiyaların aktivləşməsi, "Azərbaycan” qəzetində "Milli maraqlar naminə əməkdaşlıq” rubrikasının açılması, siyasi partiya nümayəndələrinin müxtəlif KİV-də fəal çıxışları müsbət hal kimi qiymətləndirilmiş və yeni siyasi konfiqurasiyanın təzahürü olduğu qeyd edilib.
