Genişformatlı kino texnologiyasını işləyib hazırlamış Kanadanın İMAX şirkəti Google ilə birgə virtual reallıq kamerasını hazırlamaq, eləcə də ticarət mərkəzlərində ödənişli Virtual Reallıq (VR) seansları təşkil etmək niyyətindədir. İlk növbədə dünya üzrə altı nöqtənin açılması planlaşdırılır. Mütəxəssislər İMAX və Google şirkətlərinin qərarını kino və əyləncə industriyasının gələcək inkişafında əlamətdar hadisə adlandırırlar. VR seanslarının Azərbaycanda da təşkili nəzərdə tutulurmu? Bu sualla biz İMAX-la eksklüziv müqaviləsi olan Azərbaycanın ən iri kinoteatrlar şəbəkəsinin direktoru Namiq Quliyevə müraciət etdik və o İMAX-la danışıqlar apardıqlarını təsdiqlədi.
“Park Cinema” kinoteatrlar şəbəkəsinin direktorunun sözlərinə görə, İMAX və Google artıq bu il dünya üzrə VR seansları üçün altı nöqtə yaratmaq niyyətindədirlər. Onlardan birincisi, Los-Ancelesdə açılacaq, sonradan bu cür nötələq digər ölkələrdə də, o cümlədən Çində işə düşəcək. Dünya nəhəngləri olan İMAX və Google bu yeniliyə külli miqdarda vəsait yatırıblar və hələ də sərf edəcəklər, buna görə də, maliyyə cəhətdən özünü doğrultması nöqteyi-nəzərindən onlar tərəfindən VR seanslarının nümayişi üçün dünya üzrə alıt nöqtə seçilib.
“Azərbaycandakı ən iri kinoteatrlar şəbəkəsi olaraq biz tərəfdaşımız İMAX-la bu nöqtələrdən birinin Bakıda açılmasına dair danışıqlar aparırıq. Bildiyiniz kimi, Flame Towers-dəki “Park Cinema” Qafqazda İMAX zalın açıldığı ilk kinoteatrdır. Hazırda biz VR seansları üçün tələb olunan texniki şərtləri, bunun nə dərəcədə rentabelli olacağını dəqiqləşdiririk”, - deyə Namiq Quliyev bildirib.
Kanadanın İMAX şirkəti adi kino nümayişi halında olduğu kimi, VR-texnologiyalarını kinoteatrlara icarəyə verməyi və gəlirdən pay almağı düşünür. 10 dəqiqəlik VR seansları üçün anons olunmuş qiymət 7-10 dollar arasında dəyişir.
“Hazırda ölkəmizdə kinoya biletin prta qiyməti VR seansları üçün anons olunmuş qiymətdən iki dəfə aşağıdır. Bizdə VR seansına biletin qiymətinin neçəyə olacağını söyləmək hələlik çətindir. Qiymətin yaranması prosesi özündə yerin icarəsindən tutmuş əməkdaşların əmək haqlarınadək bir sıra aspekti birləşdirir. Lazımi avadanlığın alınması, personalın hazırlanması və s. tələb olunur. Bizim tərəfimizdən bir seansın maya dəyərinin müəyyən edilməsi məqsədilə birdəfəlik investisiya qoyuluşu və cari xərclərin həcmi dəqiqləşdirilir və bundan sonra biletin qiymətini təyin etmək olar. Buna görə də, biletlərin qiyməti haqda danışmaq hələ tezdir, lakin bir məqamı qeyd etmək istəyirəm ki, qiymət ədalətli və vətəndaşların alıcılıq imkanlarına uyğun olacaq”, - deyə “Park Cinema”nın direktoru qeyd edib.
Onun sözlərinə görə, bu cür seansların əsas fərqləndirici xüsusiyyəti hər bir tamaşaçı üçün 360 dərəcəlik təsviri görmək imkanı verən xüsusi baş geyiminin olmasıdır: “Bunun nə olduğunu izah etmək üçün gerçək həyatdan nümunə gətirim. Siz gerçək məkanda olduğunuz zaman gördüyünüz mənzərə sadəcə olaraq 3D filmdə olduğu kimi üçölçülü deyil, o sizi hər tərəfdən əhatə edir. Əgər başınızı sağa çevirərsinizsə bir şey, sola çevirərsinizsə digər, geriyə çevirərsinizsə tamam başqa bir şey görəcəksiniz... Özü də bu zaman gördükləriniz multiekran kinoteatrda olduğu kimi ayrı-ayrı təsvirlər deyil, vahid məkandır. Məsələn, baş geyimini taxıb Qız Qalasının fotoşəklini açdıqdan sonra siz özünüzü onun üzərində hiss edə bilərsiniz. Biz obyektləri yalnız qarşımızda deyil, bütün tərəflərdən, o cümlədən ayaqlarımız altında və başımız üzərində görürük. Bu zaman onların görmə sahəmizə düşməsi üçün eynilə gerçək həyatda olduğu kimi başımız onlara doğru çevirmək kifayətdir. Başqa sözlə, dalma effekti ən yaxşı İMAX kinoteatrda olduğundan belə qat-qat daha güclü alınır. Kinoteatrda oturduğunuz zaman siz başqa bir tərəfə və ya ayaqlarınızın altına baxdığınız zaman gerçək həyatı görə bilərsiniz. Baş geyimində isə sizin görmə sahənizə virtual reallıqdan savayı heç nə düşmür. Və bu sizi heyrətə gətirir. Siz - Matritsadasınız”.
Xatırladaq ki, Azərbaycanda ilk yeni nəsil kinoteatrlar şəbəkəsi olan Park Cinema 2010-cu il oktyabrın 16-da fəaliyyətə başlayıb. Hazırda şəbəkə beş kinoteatrla təmsil olunub. Bu, 13 zal və 2200-dən artıq oturacaq yeri olan Park Bulvar, Metropark və Amburan-dakı kinoteatrlar , 2015-ci ildə açılmış 4 zallı 600 yerlik Park Cinema Zaqulba və 1000 yerlik 6 ədəd 3D zallı Park Cinema Flame Towers kinoteatrlarıdır. Ümumilikdə, şəbəkənin 5 meydançası, 23 ekranı və 3500 oturacaq yeri var. Park Cinema Flame Towers kinoteatrının zallarından biri İMAX texnologiyası ilə təchiz olunub – bu Zaqafqaziya regionunda bu formatlı ilk kinoteatrdır. Kinoteatrın bütün kinoteatrlarında dünyanın kinoproyeksiya sahəsində aparıcı brendlərinin avadanlığı quraşdırılıb.
