Əli Əliyevin sədri olduğu Vətəndaş və İnkişaf Partiyası (VİP) İmişli Rayon İcra hakimiyyətinin başçısı Vilyam Hacıyevin Vətəninfo.az Xəbər Portalını məhkəməyə verməsinə ehtiraz əlaməti olaraq bəyanat yayıb.

AZXEBER.COM bəyanatı olduğu kimi təqdim edir:

“Azərbaycanın müxtəlif vəzifəli dövlət məmurları onların fəaliyyətini obyektiv tənqid edən media orqanlarını azad mətbuatın susdurulmasına yönəlmiş siyasətin davam etdirilməsinə çalışırlar. Fəaliyyətlərindəki qanunsuz əməllərin ictimailəşməsindən narahat olan həmin məmurlar vəziyyətdən çıxış yolu kimi, eyni zamanda, qisas məqsədi ilə müstəqil qəzet və saytlara qarşı əsassız məhkəmə iddiaları qaldırırılar”. Əli Əliyevin sədri olduğu partiyanın yaydığı bəyanatda daha sonra deyilir ki, bu sırada növbəti addımı Azərbaycanda adı ən çox korrupsiyaya bulaşan rayon icra başçıları siyahısında öndə gələn İmişli rayon icra hakimiyyətinin başçısı Vilyam Hacıyev atıb.

“İmişlinin icra başçısı onun fəaliyyətindəki qaranlıq məqamlara işıq salan Veteninfo.Az xəbər portalını məhkəməyə verib. Çox təəccüblü və acınacaqlı haldır ki, V.Hacıyev işindəki miqyaslı nöqsanları aradan qaldırmaq əvəzinə, mətbuatla məhkəmə çəkişməsinə qoşulmağa özündə mənəvi haqq və vaxt tapıb. Vətəndaş və İnkişaf Partiyası (VİP) ölkədə azad mətbuata qarşı bütün təzyiqləri, o cümlədən, İmişli rayon icra hakimiyyətinin başçısı V.Hacıyevin Veteninfo.Az xəbər portalına qarşı məhkəmə vasitəsi ilə hücuma keçməsini qətiyyətlə pisləyir. VİP adı ən müxtəlif qanunsuzluqlarda hallanan V.Hacıyevin Veteninfo.Az xəbər portalına qarşı qaldırdığı iddianı geri götürməsini, icra başçısı olaraq öz vəzifəsinə daha məsuliyyətlə yanaşıb, haqlı tənqidlər üçün verdiyi ciddi əsasları aradan qaldırmağı tələb edir”.