Ermənistanın Baş naziri Nikol Paşinyan Rusiyanı 2022-ci ildə Azərbaycanla sərhəddə baş verən qarşıdurmalardan sonra strateji tərəfdaş hesab etmədiklərini bildirib.
AZXEBER.COM xəbər verir ki, İrəvanda keçirilən mətbuat konfransında Paşinyan Rusiya hökumətini və Kollektiv Təhlükəsizlik Müqaviləsi Təşkilatını (KTMT) təhlükəsizlik öhdəliklərini yerinə yetirməməkdə ittiham edib.
Ermənistan hökumətinin 2026–2031-ci illər üzrə proqramında Rusiyanın niyə strateji tərəfdaş kimi göstərilmədiyinə dair suala cavab verən Paşinyan 2022-ci ilin sentyabrında Azərbaycan-Ermənistan sərhədində baş verən hadisələrə diqqət çəkib.
"2022-ci ilin sentyabrında baş verən hadisələrdən sonra bunu strateji tərəfdaşlıq adlandıra bilərikmi?” – deyə Paşinyan bildirib.
O, Rusiyanın hökumət proqramında yenidən strateji tərəfdaş kimi qeyd olunması ehtimalına da münasibət bildirib. Paşinyan qeyd edib ki, belə bir ifadə yazılacağı təqdirdə, Rusiyanın və KTMT-nin 2022-ci ilin sentyabrında təhlükəsizlik öhdəliklərini niyə yerinə yetirmədiyi sualı ortaya çıxacaq.
Ermənistan hökumətinin proqramında ölkənin Rusiya ilə münasibətlərini "regionda sülhün bərqərar olması üçün yaranmış yeni şərtlər çərçivəsində” yenidən formalaşdıracağı, eyni zamanda qarşılıqlı faydaya əsaslanan çoxşaxəli əməkdaşlıq üzrə dialoqu davam etdirəcəyi qeyd olunur.
Qeyd edək ki, Rusiya rəsmiləri daha əvvəl bildiriblər ki, təhlükəsizlik öhdəlikləri beynəlxalq səviyyədə Azərbaycanın ərazisi kimi tanınan Qarabağa şamil edilmirdi və bu öhdəliklər yalnız Ermənistanın öz ərazisini əhatə edirdi.
Gülay
