Ermənistanın baş naziri Nikol Paşinyan jurnalistlərə müsahibəsi zamanı "Zəngəzur dəhlizi, Şərqi Zəngəzur nə deməkdir? Azərbaycanın Naxçıvanla hansı yollarla əlaqəsi olacağına Ermənistan qərar verir” kimi ifadələr səsləndirib. Paşinyan Azərbaycan, Ermənistan və Rusiya rəhbərlərinin görüşü zamanı Zəngəzur dəhlizi haqqında danışıqların olmayacağını da bildirib.
Bəs Paşinyan bu cür açıqlamaları Zəngəzur dəhlizinin açılmasına mane ola bilərmi?
Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov AZXEBER.COM-a açıqlamasında bildirib ki, Azərbaycan Zəngəzur dəhlizinin açılması üçün həlledici işləri görməkdədir:
"Ermənistanın baş naziri Nikol Paşinyan indiyə qədər müxtəlif ünvanlarda çıxışları zamanı kommunikasiyaların açılması, o cümlədən Zəngəzur dəhlizinin yaradılması barədə ziddiyətli açıqlamalar verib, lakin Azərbaycanın haqlı həmlələri qarşısında geri çəkilərək kommunikasiyaların bərpasına razı olduqlarını bildirib. Bir neçə gün əvvəl rəşadətli Azərbaycan Ordusunun dövlət sərhədində təxribat törədən erməni hərbçilərinə layiqli dərs verməsindən və mühüm postlara sahib olmasından sonra yalvarışlar edən Paşinyan Zəngəzur dəhlizinin açılması ilə yanaşı, sülh sazişini imzalamağa hazır olduğunu bildirdi. İndi onun yenidən şübhəli açıqlamalarla çıxış etməsi qeyri-ciddi və xəstə təxəyüllü bir hökumət başçısının sayıqlamalarından başqa bir şey deyil”.
Millət vəkilinin fikrincə, ötən ay Azərbaycan və Türkiyə Prezidentlərini iştirakı ilə Horadiz-Cəbrayıl-Zəngilan-Ağbənd avtomobil yolunun təməli qoyması ilə Zəngəzur dəhlizinin açılması da həlledici mərhələyə qədəm qoydu:
"Zəngəzur dəhlizinin faktiki olaraq ilk qapısı hazır vəziyyətə gətirilib. Ona görə də, Paşinyanın dediklərinin heç bir əhəmiyyəti yoxdur, dəhlizin və kommunikasiyaların açılması ilə bağlı 10 noyabr sazişində nəzərdə tutulmuş şərtlərin həyata keçirilməsi qarşısıalınmaz bir prosesə çevrilib və heç kim buna mane ola bilməz. N.Paşinyan öz ölkəsində yaranmış siyasi gərginliklər fonunda bu cür açıqlamalr verməklə auditoriyanı öz üzərindəki yükdən azad etmək məqsədilə belə manipulyasiyalar edir. Onun digər açıqlamalarına isə diqqər etdikdə, dəhlizin açılmasına razılıq verməkdən başqa çarəsi olmayacağı nüanslarını da açıq şəkildə görmək mümkündür".
A.Hüseynov onu da bildirib ki, Zəngəzur dəhlizinin açılması ən çox Ermənistan və Paşinyan hökuməti üçün faydalı ola bilər:
"Bu dəhliz regionun siyasi və iqtisadi xəritəsini dəyişən mühüm vasitə ola bilər. Belə ki, bölgədəki çoxşaxəli magistral yolların yaradılması sayəsində Ermənistanın hər istiqamətlərə yolu açılacaq. Xüsusilə də Ermənistannı bölgənin ən inkişaf etmiş nəhəng ölkəsi olan Türkiyəyə qapısı açılmış olur. Bu isə ermənilərin qaranlıq dalandan çıxması, iqtisadi proseslərə qoşulması və inkişafa doğru addım atması deməkdir. Eləcə də, İran, Gürcüstan da daxil olmaqla Azərbaycanın bütün qonşuları bu perspektiv dividentlərdən istifadə edəcəklər. Bir sözlə, bu layihələr kənarlaşdırıcı deyil, əhatəedicidir. Yəni, Zəngəzur dəhlizi dostluq və faydalı birgə əməkdaşlıq qapısı olmaqla bütün iştirakçıların , o cümlədən də Ermənistanın gələcəyinə işıq yandırır. Ona görə də, hər bir ölkə xoş niyyətlə, heç bir iddia olmadan, yalnız sülhə və geniş əməkdaşlığa töhfə verə biləcək iradə nümayiş etdirməklə bu trans-kommunikasiya ailəsinin üzvünə çevrilə bilər. Xüsusilə də, Ermənistan belə bir fürsəti qaçırmamalıdır. Əks halda onun üçün yeni fəlakət dalğası başlayacaq”.
Aydın Nuri
