Quduzluq insanlarda, eləcə də heyvanlarda rast gəlinən bir virusdur. Bu virus heyvanın digər heyvanı dişləməsi, yaxud insana hücum etməsi nəticəsində keçə bilir. Bu xəstəlik ev, çöl heyvanlarında, əsasən də itlərdə baş verən öldürücü virusdur.
AZXEBER.COM xəbər verir ki, insanlar xüsusən itlərin onları dişləməsinin quduzluqla nəticələnə biləcəyini bilirlər, amma əksər insanların bilmək istədiyi "Pişikdən insana quduzluq keçir? sualına cavab tapmaqdır.
Quduzluq əksər insanların və məməlilərin beyin toxumasında iltihaba səbəb olan zoonoz (heyvanlardan insanlara keçən) xəstəlikdir. İt, pişik, keçi, at, eşşək, inək kimi ev heyvanları və canavar, tülkü, çaqqal, donuz, ayı, sansar, kirpi və köstəbək kimi vəhşi heyvanlar quduzluğa yoluxa bilər.
Bu xəstəlik quduz bir heyvanın tüpürcəyinin dəri, gözlər, ağız və burun ilə təması zamanı, insanı dişləməsi vaxtı yayılır.
Bəs heyvanlarda quduzluq simptomları hansılardır?
Heyvanın davranışında və ya hərəkətlərində dəyişikliklər, qorxaqlıq, əsəbilik və aqressivlik müşahidə edilə bilər. Quduz olan heyvanın adətən dişləmək istəyi güclü olur.
Bu əlamətləri göstərən heyvanlardan qaçınılmalı və onlarla təmasda olunarsa, dərhal sonra mütəxəssisə müraciət edilməlidir.
Ayşən Mirzəyeva
