Piylənmənin müalicəsində istifadə olunan preparatın tablet forması Almaniyada apteklərdə satışa təqdim edilib.
AZXEBER.COM xəbər verir ki, Danimarkanın "Novo Nordisk” şirkəti tərəfindən hazırlanan, aktiv maddəsi semaglutid olan dərman yalnız böyüklər üçün təsdiqlənib və həkim resepti ilə istifadə edilə bilər.
Sentyabrın 1-dən etibarən Almaniya apteklərində satışa çıxarılan tabletin qiymətinin doza və qablaşdırmadan asılı olaraq 170-280 avro arasında dəyişəcəyi gözlənilir. Almaniya Avropa İttifaqında iyul ayında təsdiqlənən Wegovy tabletinin satışa təqdim edildiyi ilk ölkə olub.
Həb formasında da inyeksiya formasında olduğu kimi semaglutid maddəsindən istifadə edilir. Bu maddə toxluq hissi ilə əlaqəli bağırsaq hormonlarının təsirini təqlid edərək iştahanın azalmasına kömək edir.
Həbin effektivliyi OASIS-4 klinik tədqiqatında araşdırılıb. 64 həftə davam edən araşdırmada semaglutid qəbul edən artıq çəkili böyüklərdə orta hesabla 13,6 faiz çəki itkisi müşahidə olunub.
Müqayisə üçün, preparatın inyeksiya formasının 72 həftəlik istifadəsini əhatə edən araşdırmada çəki itkisinin təxminən 19 faizə çatdığı bildirilib.
Mütəxəssislərin sözlərinə görə, preparatın istifadəsi zamanı xüsusilə ürəkbulanma və ishal kimi mədə-bağırsaq yan təsirləri yarana bilər. Daha ciddi fəsadlar, o cümlədən pankreatit riski də qeyd olunur.
Bu səbəbdən mütəxəssislər həbin yalnız həkim nəzarəti altında qəbul edilməsini tövsiyə edirlər.
Alman Diyabet Cəmiyyətinin rəhbəri Julia Szendrödi isə piylənmə dərmanlarının müstəqil arıqlama vasitəsi kimi deyil, xroniki xəstəlik olan piylənmənin müalicə üsullarından biri kimi qiymətləndirilməli olduğunu bildirib. Onun sözlərinə görə, dərman müalicəsi balanslı qidalanma və müntəzəm fiziki aktivliklə dəstəklənməlidir.
Gülay
