"İranın Azərbaycanın Naxçıvan bölgəsinə dron hücumları beynəlxalq hüququn kobud şəkildə pozulmasıdır”.
Bu sözləri AZXEBER.COM-açıqlamasında politoloq Turan Rzayev deyib.
O bildirib ki, Azərbaycan İran-İsrail-ABŞ qarşıdurmasının tərkib hissəsi deyil:
Azərbaycan İran-İsrail-ABŞ qarşıdurmasının tərkib hissəsi deyil. Azərbaycan İsrail və ABŞ-nin hərbi bazaları, texnikası yoxdur. Eyni zamanda Azərbaycan ərazisindən İrana zərbələr endirilməyib. Amma buna baxmayaraq, İran tərəfindən Azərbaycanın ərazisinə zərbələr endirildi.
Azərbaycan Prezidenti İlham Əliyev İran səfirliyinə getdi. İranın Ali dini rəhbəri Xameneinin anım tədbirinə qatıldı və onunla bağlı xoş sözlər ifadə etdi. Prezidentin qeyd etdiyi kimi, İrandan Livandakı diplomatların çıxarılmasına görə Azərbaycanın yardım göstərdiyi bir zamanda zərbələr endirdilər.
Bu, süveren ölkənin ərazilərinə qarşı qəsddir, regionun bitərəf ölkəsi olan Azərbaycana qarşı atılan namərd addımdır”.
Politoloq qeyd edib ki, İran digər ölkələrdə Azərbaycanı səhv salmamalıdır:
"Azərbaycan İran üçün digər ölkələr deyil. Azərbaycan İranın zərbələrinə məruz qalacağı və buna sakit baxacağı bir ölkə deyil. Azərbaycan ordusu 44 günlük Vətən Müharibəsini, lokal xarakterli əməliyyatları uğurla həyata keçirən qalib bir ordudur. Bu qalib ordunun təcrübəli, uzaqgörən və vizionlu bir baş komandanı var. Bu ordunun komandir heyətləri mövcuddur və ən müasir silahlara sahibdir. Azərbaycan çox rahat şəkildə İranın qarşısında ciddi problemlər yarada biləcək potensiala malik bir ölkədir. Müharibəni saylar yox, doğru taktika və yaxşı əlaqələr qazandırır”.
O bildirib ki, Rusiya tərəfinin bu məsələyə biganə qalmasını bir neçə səbəbdən əsaslandırmaq olar:
"Bir müddət öncə Rusiya Federasiyası Hökumətinin sədri Mixail Mişustinin Azərbaycana səfəri oldu. Onunla geniş şəkildə müzakirələr aparıldı, iki ölkə arasında mövcud problemlər və həll istiqamətləri müzakirə olundu. Rusiya tərəfi Azərbaycanla münasibətləri normallaşdırmaq istəyir kimi görünür. Bu, əsasən zaman məsələsidir. İkincisi, Rusiya hələlik məsələyə izləyici qalır, proseslərin necə inkişaf edəcəyinə baxır. Ona görə səssizliyini qorumuş ola bilər.
Azərbaycan dostunu və düşmənini, yanında olanı və arxadan zərbə vurmaq istəyəni yaxşı bilir. Hər ölkə tutumuna görə qiymət alacaq. Necə ki, 44 günlük Vətən Müharibəsi zamanı Azərbaycanın yanında olanlar indi də ölkəmizin bərpa prosesində və digər məsələlərdə nəzərə alınır.
Rusiya mövqeyini hər halda bəlli edəcək. İran Rusiyanın Azərbaycana məxsus AZAL təyyarəsini vurması kimi oxşar hadisəni etdi”.
Şahanə Ziyad
