Xəbər verdiyimiz kimi, Şəmkirdə dərman zəhərlənməsi diaqnozu ilə xəstəxanaya yerləşdirilən qadın vəfat edib.
Hadisə dərmanların düzgün və həkim nəzarəti altında qəbul edilməsinin vacibliyini bir daha gündəmə gətirib.
AZXEBER.COM xəbər verir ki, dərmanlar düzgün istifadə edilmədikdə insan orqanizmi üçün ciddi təhlükə yarada bilər. Xüsusilə preparatın normadan artıq qəbul edilməsi, müxtəlif dərmanların həkim məsləhəti olmadan birlikdə istifadəsi və tərkibində eyni təsiredici maddə olan bir neçə preparatın qəbul edilməsi zəhərlənmə riskini artıra bilər.
Mütəxəssislər bildirirlər ki, dərmanın "çox qəbul edildikdə daha tez təsir göstərəcəyi” düşüncəsi yanlışdır. Preparatın dozasının artırılması onun müalicəvi təsirini gücləndirmək əvəzinə, orqanizmə zəhərli təsir göstərə bilər. Xüsusilə ağrıkəsicilər, sakitləşdiricilər və digər güclü təsirə malik dərmanların nəzarətsiz qəbulu təhlükəli nəticələrə gətirib çıxara bilər.
Bundan başqa, müxtəlif adlarla satılan dərmanların tərkibində eyni təsiredici maddə ola bilər. İnsan bunu bilmədən bir neçə preparat qəbul etdikdə həmin maddənin orqanizmə daxil olan ümumi miqdarı normanı keçə bilər. Bu səbəbdən eyni vaxtda bir neçə dərman istifadə edən şəxslərin onların bir-biri ilə uyğunluğunu həkim və ya əczaçıdan dəqiqləşdirməsi vacibdir.
Dərmanların spirtli içkilərlə birlikdə qəbulu da bəzi hallarda ciddi risk yarada bilər. Xüsusilə yuxugətirici və sakitləşdirici təsir göstərən preparatlarla spirtin birlikdə istifadəsi şüurun dəyişməsi, tənəffüsün zəifləməsi və digər ağır fəsadlara səbəb ola bilər.
Dərman qəbul edərkən preparatın təlimatına və həkim göstərişinə əməl etmək, müəyyən edilmiş dozadan artıq istifadə etməmək, son istifadə tarixini yoxlamaq və dərmanı başqasının məsləhəti ilə qəbul etməmək tövsiyə olunur. Həmçinin dərmanlar uşaqların əli çatmayan yerdə saxlanılmalıdır.
Dərman qəbulundan sonra güclü halsızlıq, həddindən artıq
yuxululuq, şüurda dəyişiklik, nəfəs almaqda çətinlik, qıcolma, davamlı qusma və
ya digər ciddi əlamətlər yaranarsa, vaxt itirmədən təcili tibbi yardım çağırmaq
lazımdır.
Fəridə Əsədzadə
