"Sadəcə, özüm olmaq istəyirəm. Oğlan kimi doğulsam da, batinim qızdır, qadındır. Qadın olmaq istəyirəm. Özümü qadın kimi hiss edirəmsə, problem nədir?!"
19 yaşlı amerikalı Dilan Uolton qadın olmağı arzulayır və cinsiyyətin dəyişdirilməsi əməliyyatını gözləyir.
O, adını dəyişərək "Liya" qoyub və belə çağırılmasını istəyir.
Dilanın oxuduğu kollecə qadın paltarında getməsi bu təhsil müəssisəsində qalmaqala və narazılıqlara səbəb olub.
ABŞ-ın Missisipi ştatındakı Souz Panola şəhərciyində yaşayan Dilan Uoltonun dediyinə görə, hələ 7 yaşı olanda dodağına pomada çəkirdi. 16 yaşında isə o, qadın alt paltarı geyinməyə başlayıb.
"Qadın paltarı geyib məktəbə yollananda məni əllərində "Cəhənnəmə xoş gəldin!", "Murdarçılıq!" yazılmış şüarlar tutan tələbələr və valideynlər qarşıladılar.
Onların baxışları nifrət dolu idi. Halbuki insan haqlarım pozulurdu. Mənim hara necə paltar geyinəcəyimə yalnız özüm qərar verə bilərəm, - "Liya" olmaq istəyən Dilan Uolton deyib. - Belə mühafizəkar, savadsız, tərbiyəsiz davranış məni sinirləndirdi və qorxutdu.
O hadisədən bir neçə gün sonra kollecə getmədim. Anama minnətdaram. O, ən çətin anlarımda həmişə mənə dəstək olub. Bir neçə gün sonra məktəbə qayıdanda isə bir neçə nəfər mənə yaxınlaşdı, cəsur olduğumu dedi, təbrik etdi".
Dilanın anası, 42 yaşlı Kim Hudun sözlərinə görə, oğlunun seçimini anlamağa çalışır: "Oğlum balaca olanda dodaqlarına pomada çəkir, qız paltarları geyinirdi. Onu tənbeh edir, bu əməllərdən çəkindirməyə çalışırdım. Amma bir nəticə hasil olmadı. İndi, artıq yetkin gəncdir. Həyatı ilə bağlı özü qərar verməlidir".
"Liya"nın dediyinə görə, cinsiyyətin dəyişdirilməsi ilə bağlı əməliyyata 25 min dollar gərəkdir.
///Milli.az
