Mayın 28-də Azərbaycan Respublikasının Prezidenti İlham Əliyev Laçın şəhərinə qayıdan əhali ilə görüşüb, evlərin açarlarını onlara təqdim edib. Ölkə başçısı Laçındakı çıxışında bir sıra mühüm məqamlara toxunub: "Miatsum” kitabı bağlandı, separatizmin kitabı bağlandı. Müstəqillik xülyası statusun dalınca getdi. Statusu isə biz hələ İkinci Qarabağ müharibəsi zamanı lazım olan yerə göndərmişik".
İlham Əliyevin Laçından verdiyi mühüm mesajları Milli Məclisin deputatı Sahib Aliyev AZXEBER.COM-a şərh edib.
Sahib Aliyev bildirir ki, Müzəffər Ali Baş Komandanımızın Laçındakı xəbərdarlığından da göründüyü kimi biz öz torpaqlarımız üzərində suverenliyimizi tam təmin etmənin sonuncu mərhələsindəyik:
"Müzəffər Ali Baş Komandanımız cənab İlham Əliyevin xəbərdarlığından gəldiyim nəticə bundan ibarətdir ki, Qarabağdakı separatçı ünsürlərə cəmisi bir neçə ay vaxt verilir, ya Azərbaycan dövlətinə boyun əyəcək, ya rədd olub gedəcəklər. Əlində silah müqavimət göstərənlər isə zərərsizləşdiriləcəklər. Bu xəbərdarlığın hərbçilər qarşısında deyil də, evlərinə dönən laçınlı bacı və qardaşlarımızla söhbət formatında edilməsini isə Qarabağdakı haydillilər də, onlara geosiyasi alət gözündə baxanlar da böyük lütf saymalıdırlar. Hər şey anidən də ola bilərdi, amma Azərbaycan qan tökmək istəmir, düşünmək üçün vaxt verir ki, onun da bitməsinə artıq sayılı həftələr qalır”.
Sahib Aliyev yaxın zamanlarda Xankəndində Azərbaycan bayrağının dalğalancağı ilə bağlı da eyni dərəcədə nikbin olduğunu söyləyir:
"Qarabağdakı separatçı ünsürlər Azərbaycan dövlətinə boyun əyməli, uydurma vəzifələrini tərk etməli, saxta parlamentlərini buraxmalıdırlar. Qarabağda vəziyyəti gərginləşdirməyə cəhd edən Ermənistan rəhbərliyi cənab İlham Əliyevin ədalətli delimitasiya, Laçından görünən kəndlər haqda dediklərini unutmamalıdırlar”,- deyə Sahib Aliyev vurğulayıb.
Şəbnəm Zahir
