"İki həftəlik təlim-məşq toplanışında artıq iki oyun keçirmişik. Məqsədimiz komanda oyunumuzu və futbolçular arasında əlaqəni yaxşılaşdırmaq, fiziki baxımdan hazır vəziyyətə gəlməkdir".
AZXEBER.COM-un məlumatına görə, bu fikirləri "Qarabağ"ın futbolçusu Qara Qarayev klubun rəsmi saytına açıqlamasında Avstriyadakı təlim-məşq toplanışı barədə danışarkən deyib.
29 yaşlı yarımmüdafiəçi bildirib ki, hazırlıq istədikləri kimi gedir: "Toplanış çərçivəsində daha bir görüş keçirəcəyik. Bakıya qayıtdıqdan sonra Konfrans Liqasında "Aşdod”la oyunlara hazırlaşacağıq. Bu turnir yeni təcrübədir. Hədəfimiz "Qarabağ” adına layiqli mübarizə aparmaqdır. Uğurlu nəticə qazanmağa çalışacağıq. Yeni turnir olmasına baxmayaraq, komandaların səviyyəsi kifayət qədər yaxşıdır".
Təcrübəli oyunçu azarkeşlərin avrokubok matçlarına buraxılmasına da münasibət bildirib: "Çox sevindirici haldır ki, azarkeşlər tribunalara qayıdır. Onlar üçün çox darıxmışıq. Uzun müddətdir fanatlar olmadan oynayırıq. Fikrimcə, "Qarabağ”ın əsas güclərindən biri azarkeşləridir. Ümid edirəm ki, icazə verilən qədər azarkeş gələcək və bizi dəstəkləyəcək. Bu, bizim üçün çox önəmlidir. Dolu tribunalar qarşısında oynamaq üçün darıxmışıq. Azarkeşlərə qovuşmaq hissini yaşayacağıq".
Qeyd edək ki, iyulun 22-də Tofiq Bəhramov adına Respublika Stadionunda keçiriləcək "Qarabağ" - "Aşdod" oyunu saat 20:00-da başlayacaq. Cavab matçı isə 1 həftə sonra İsraildə olacaq.
