Yaşıl Enerji Məşvərət Şurası çərçivəsində Prezident İlham Əliyevin səsləndirdiyi fikirlər Azərbaycanın enerji siyasətində yeni mərhələnin başlandığını göstərir. Dövlət başçısının vurğuladığı kimi, Azərbaycan qazı artıq təkcə Avropa məkanı ilə məhdudlaşmır – ixrac coğrafiyası genişlənir və yeni istiqamətlər formalaşır.
Bu kontekstdə ilk dəfə olaraq Suriyaya qaz tədarükünün başlanması xüsusi əhəmiyyət daşıyır. 1,5 milyard kubmetr həcmində planlaşdırılan ixrac sadəcə enerji müqaviləsi deyil; bu, elektrik enerjisi qıtlığından əziyyət çəkən bir ölkəyə real dəstəkdir. Elektrik enerjisi olmadan nə iqtisadi inkişafdan, nə sosial rifahdan, nə də təhlükəsizlikdən danışmaq mümkündür. Deməli, bu addım humanitar və iqtisadi mahiyyət daşıyır.
Prezidentin çıxışında diqqət çəkən əsas məqamlardan biri qaz təchizatının şaxələndirilməsi məsələsidir. Əgər indiyədək daha çox istehlakçı ölkələrin enerji mənbələrini şaxələndirməsinin vacibliyindən danışılırdısa, indi istehsalçı ölkələr üçün də bu amilin strateji əhəmiyyət kəsb etdiyi açıq şəkildə vurğulanır. Azərbaycan həm istehsalçı, həm də etibarlı tərəfdaş kimi riskləri balanslaşdırmaq və bazarlarını genişləndirmək siyasətini davam etdirir.
Digər mühüm məqam isə əməkdaşlıq modelidir. İstehsalçı Azərbaycan, tranzit ölkələr və istehlakçılar arasında formalaşan qarşılıqlı etimad və fayda prinsipi artıq on ildən çoxdur ki, özünü doğruldur. Bu model təkcə iqtisadi deyil, həm də siyasi sabitliyin və regional əməkdaşlığın dayaqlarından birinə çevrilib.
Nəticə etibarilə, Azərbaycanın enerji strategiyası yeni coğrafiyalara açılmaqla yanaşı, çoxtərəfli əməkdaşlıq və qarşılıqlı maraqlar üzərində qurulan davamlı inkişaf xəttini qoruyur. Bu isə ölkənin enerji diplomatiyasını daha çevik və dayanıqlı edir.
Ülviyyə Rəhimova
Göygöl rayonu üzrə Təhsil sektorunun məsləhətçisi
