Qazaxıstanda xilasedicilər 95 avtomobilin iştirakı ilə baş verən zəncirvarı yol-nəqliyyat hadisəsi nəticəsində xəsarət alan 10 nəfəri xəstəxanalara çatdırıblar.
Bu barədə Qazaxıstan Fövqəladə Hallar Nazirliyinin mətbuat xidməti məlumat yayıb.
Xilasetmə əməliyyatları zamanı 8-i uşaq olmaqla 71 nəfər təxliyə edilib, daha 11 nəfər xilas edilib. Onlardan 10-u Makinsk rayon xəstəxanasına yerləşdirilib.
Xatırladaq ki, bundan əvvəl "Kazavtozhol” milli avtomobil yollarının idarə olunması xidməti qar çovğunu və ölkə magistralının Astana-Petropavlovsk hissəsində zəif görmə ilə əlaqədar bütün növ nəqliyyat vasitələri üçün hərəkətə məhdudiyyətin qoyulması barədə məlumat yaymışdı.
Hava şəraiti yaxşılaşdıqdan və yol təmizləndikdən sonra polis idarəsinin əməkdaşlarının müşayiəti və "Kazavtozhol” xüsusi texnikası ilə Şuçinsk şəhəri istiqamətində hərəkətin fəaliyyəti bərpa edilib.
Lakin sürücülərin sürət həddinə və təhlükəsizlik məsafəsinə riayət etməməsi səbəbindən 95 avtomobilin iştirakı ilə qəza baş verib.
///report
