Sənin hədiyyən Səndən başqa kimsəni görməyən gözlərimlə, Səsindən başqa səs eşitməyən qulaqlarımla Tilsimindəydim. Ruhum xəyalınla qolboyun, Qəlbim sənin əsirin, Cismim sənin kölgəndi... “Sevirəm” söyləyən dodaqlarımı Öpmək istədiyim Barmaqlarınla qapadın, Ən gözəl duyğularımı Baxışlarınla yamanladın,qınadın... Qırmaq istədiyim inadın Qəzəbə çevrilib üstümə ələndi, Duyğularım sarsıldı, çilikləndi, Gözlərimdə dondu qəlbimin ahı— Səni sevməkdimi günahım?.. Xatirən də özüntək amansızdır, qəddardır... Səninçün nə fərqi var— Könlündə ilk bahardır. Mənim əzablarımdan yolunda tikan bitmir, Qəlbinə kölgə düşmür, Sənin soyuqluğundan Mənim sevgim dəyişmir... Elə bilmə, yolunda bitməyə tələsirəm, Daha qəlbimə deyil, qüruruma əsirəm! Zaman qoparıb alır məni Qəmin əlindən— Artıq yaşayıram mən. Duyğumun yaddaşında, Bilirsənmi, əslində, Qəribə olan nədir? Ürəyimə vurduğun, arabir sızıldayan ən dərin yaralar da Atmağa qıymadığım Sevimli hədiyyəndir... Qəlbimin halına yanan gərəkdir...Bağışla, Narahat edirəm səni Sənə yad hissimlə, qərib duyğumla. Bu duyğu rahatlıq vermir ki mənə, narahat etməyim mən də özgəni acı ayıqlığım, şirin yuxumla. Bilirəm, əlinə yetişməz əlim, Dünya dağılsa da, ola bilməzsən Heç zaman, Heç zaman, Heç zaman mənim! Nə bir ümidim var, Nə bir təsəllim... Gör, necə atəşə salmısan məni— Necə yana-yana sevirəm səni?!. Ayağım başımı götürüb hərdən Gəzir küçələrdə bir sərsəritək— Hər yerdə izini axtarır ürək... Hərdən də az qalır köksümü yarıb, Səni sevən qəlbi dartıb-çıxarıb Çırpım, Elə çırpım, Tökülsün izin— Bir daha izini görməsin gözüm! ...Yenə aldadıram yetim qəlbimi— dağlardan baş alıb gələn sel kimi alıb aparırsa ürəyi sevgi, qaçıb can qurtarmaq mümkün deyil ki! Gör, necə atəşə salmısan məni— Necə yana-yana sevirəm səni! Əzabım qurd kimi yeyir içimi— Hər günüm narahat, hər gecəm oyaq. Bilmirəm, haradır yerim, məskənim— Ağıl tərəddüddə, hisslər başayaq... Ümidim, gümanım bəzən aldadır— Xəyalın qəlbimi qoynuna alır... Ayılıb görəndə yenə də təkdir, Qəlbimin halına yanan gərəkdir... Gör, necə atəşə salmısan məni— Necə yana-yana sevirəm səni... Sədaqət Əhmədova
