İsrail və HƏMAS arasında mübahisəli məsələlər üzrə danışıqlar davam edir.
AZXEBER.COM xarici mətbuata istinadən xəbər verir ki, tərəflər bildiriblər ki, Misirin paytaxtı Qahirədə Qəzza zolağında atəşkəsin yaradılması və məhbusların azad edilməsi ilə bağlı davam edən danışıqlarda İsrail və HƏMAS arasında mübahisəli məqamların həlli istiqamətində danışıqlar davam edir.
Aprelin 26-da Misir və Qətərin vasitəçiliyi ilə hazırlanan yeni atəşkəs və qarşılıqlı məhbus mübadiləsi razılaşması təklifinin HƏMAS-a təqdim edildiyi və HƏMAS-ın bu təklif üzərində çalışdığı və tezliklə cavab verəcəyi açıqlanıb.
Qeyd olunub ki, HƏMAS-ın nümayəndə heyəti aprelin 22-də atəşkəs təklifini müzakirə etmək üçün Qahirəyə gedib.
İsrail hakimiyyətinin məlumatına görə, Qəzza zolağında bəziləri sağ, bəziləri isə ölü olmaqla 130-dan çox israilli məhbus var.
HƏMAS-ın silahlı qanadı İzzəddin əl-Qəssam Briqadaları İsrailin Qəzzaya hücumları zamanı öldürülən israilli məhbusların sayının 70-i keçdiyini açıqlayıb.
Oktyabrın 7-dən İsrailin Qəzza zolağına hücumları nəticəsində 34 mindən çox fələstinli, o cümlədən 24 mindən çox qadın və uşaq həlak olub. Səhiyyə sisteminin çökmək üzrə olduğu bölgədə 77 mindən çox yaralının olduğu, 7 minə yaxın insanın isə itkin düşdüyü bildirilir. 1,9 milyondan çox fələstinli Qəzza zolağından məcburi köçkün düşüb.
Birləşmiş Millətlər Təşkilatının Təhlükəsizlik Şurasının martın 25-də qəbul etdiyi "atəşkəs qərarı”na məhəl qoymayan İsrail ordusunun hücumları davam edir. Beynəlxalq ictimaiyyətin xəbərdarlıqlarına baxmayaraq, İsrail rəsmiləri təxminən 1,5 milyon fələstinlinin sığındığı Qəzza zolağının cənubundakı Rəfaha qurudan hücum edəcəklərini söyləməkdə davam edir.
