Qırğızıstanın paytaxtı Bişkekdə inzibati-ərazi islahatından sonra küçə və prospektlərin adlarında genişmiqyaslı dəyişikliklər edilib.
AZXEBER.COM xarici mediaya istinadən xəbər verir ki, təkrar adların aradan qaldırılması və nəqliyyat marşrutlarının sadələşdirilməsi məqsədilə bir sıra küçələr birləşdirilərək onlara qırğız və milli adlar verilib.
Dəyişikliklər zamanı sovet dövründən qalan bir sıra adların istifadəsinə də son qoyulub. Bunlar arasında Puteprovodnaya, Molodaya Qvardiya, Seleksionnaya, Muromskaya, Pobeda, Vasilyevski Trakt, Maksim Qorki, Okrainnaya, Naberejnaya və Tsentralnaya Bereqovaya küçələrinin adları da var.
Təxminən 1,5 milyon əhalisi olan Bişkekdə əsas prospektlər Çuy, Jibek Jolu, Cengiz Aytmatov və Aalı Tokombayev adlarını daşıyacaq.
Şəhərin əsas küçələrinə isə Qırğızıstanın milli və tarixi şəxsiyyətlərinin adları verilib. Bunlar arasında Manas, Şabdan Batır, Cusup Abdrahmanov, Kurmancan Datka, İmanalı Aydarbekov və Absamat Masaliyev küçələri yer alır. Bundan başqa, Ankara, Mahatma Qandi və Den Syaopin kimi beynəlxalq əhəmiyyətli adlar da qorunub.
Qırğızıstan Prezidentinin iqamətgahının yerləşdiyi Cengiz Aytmatov və Manas küçələri Cengiz Aytmatov prospekti adı altında birləşdirilib.
Şəhərin qərb və şərq hissələrini birləşdirən Mixail Frunze, Den Syaopin, Çuy və Şabdan Batır küçələri isə Çuy prospektinin tərkibinə daxil edilib.
Çuy və Jibek Jolu prospektləri ilə Pobeda küçəsi Jibek Jolu prospekti adı altında birləşdirilib.
Jayıl Baatır, Absamat Masaliyev, Aalı Tokombayev və Kayıkov küçələri isə Aalı Tokombayev prospekti adı ilə birləşdirilib.
Bir sıra əsas küçələrin də adı dəyişdirildi
Maksim Qorki və Ankara küçələri Ankara küçəsi adı altında birləşdirilib. Anvarbek Çortekov və Krivonosov küçələri isə Absamat Masaliyev küçəsi adlandırılıb.
Bereqovaya, Okrainnaya, Kok-Say, Kurmanaliyev və Naberejnaya küçələri Den Syaopin küçəsinin tərkibinə daxil edilib.
Baytik Batır, Cusup Abdrahmanov, Abdınasır Elebesov və Tsentralnaya küçələri Cusup Abdrahmanov küçəsi adını alıb.
Lev Tolstoy, Puteprovodnaya və Sarı Özön küçələri Şabdan Batır küçəsi adı altında birləşdirilib.
Bişkek hava limanını şəhərlə birləşdirən Yulius Fuçik və Vasilyevski Trakt küçələri isə Manas küçəsi adlandırılıb.
Molodaya Qvardiya bulvarı ilə Mahatma Qandi küçəsi birləşdirilərək İmanalı Aydarbekov küçəsi adını alıb. Seleksionnaya və Muromskaya küçələri isə Mahatma Qandi küçəsi kimi müəyyən edilib.
7 Aprel və Kurmancan Datka küçələri birləşdirilərək Kurmancan Datka adı altında yenidən təşkil olunub. Vinogradnaya küçəsinə isə Lev Tolstoy adı verilib.
İslahat nəticəsində şəhərin ərazisi üç dəfə genişlənib
İnzibati-ərazi islahatı nəticəsində Bişkekin ərazisi təxminən üç dəfə böyüyüb. Ətraf yaşayış məntəqələrinin şəhərə birləşdirilməsi ilə inzibati sərhədlər və infrastruktur xidmətlərinin əhatə dairəsi genişlənib. Bu proses nəticəsində şəhərdə eyni adlı küçələrin sayı artıb.
Bişkek meriyası bildirib ki, texniki infrastruktur işləri başa çatdıqdan sonra ictimai nəqliyyat marşrutları, dayanacaqlar barədə məlumatlar və şəhər infrastrukturu yenilənəcək. Bununla yanaşı, şəhərin kadastr və rəqəmsal ünvan xəritəsinin də tam şəkildə yenilənməsi nəzərdə tutulur.
