Qrenlandiyanın xarici işlər naziri Vivian Motsfeldt Ağ Evdə ABŞ administrasiyasının nümayəndələri ilə keçirdiyi görüşdən sonra verdiyi müsahibə zamanı göz yaşlarını saxlaya bilməyib.
Bu barədə KNR radiostansiyası məlumat yayıb.
"Son bir neçə gün bizim üçün olduqca ağır keçdi. Görüşlərə hazırlaşmışdıq, lakin üzərimizdəki təzyiq getdikcə artmaqda idi", - deyə diplomat bildirib.
Vivian Motsfeldt həmçinin qeyd edib ki, rəhbərlik etdiyi qurum danışıqlara hazırlıq və təhlükəsizlik şəraitində fəaliyyət göstərmək imkanlarının yaradılması üzərində intensiv şəkildə çalışıb:
"Şəraitin necə olacağını bilmirdik. Ona görə də bütün mümkün ssenarilərə hazır olmağa çalışırdıq".
Xatırladaq ki, yanvarın 14-də Vaşinqtonda Danimarka və Qrenlandiyanın xarici işlər nazirləri ABŞ-nin vitse-prezidenti Cey Di Vens və dövlət katibi Marko Rubio ilə görüşərək Qrenlandiya ətrafındakı mövcud vəziyyəti müzakirə ediblər.
/Oxu.az
