“ Mən də sizin kimi, məyusam. Komandam çox istəyirdi qalib gəlsin. Təəssüf ki, biz istədiyimiz kimi olmadı”. Apasport.az saytının məlumatına görə, bunu “Qarabağ”ın baş məşqçisi Qurban Qurbanov deyib.
UEFA Çempionlar Liqasının III təsnifat mərhələsi çərçivəsində “Seltik”i qəbul edən “Qarabağ” meydançanı 0:0 hesabı ilə tərk edib. Şotlandiyadakı ilk qarşılaşmada rəqibinə minimal hesabla (0:1) uduzan Ağdam təmsilçisi bununla da Çempionlar Liqası ilə vidalaşıb.
Təmsilçimiz mübarizəni Avropa Liqasının pley-off mərhələsində davam etdirəcək.
Qurban Qurbanov matçdan sonra keçirilən mətbuat konfransında sözlərinə bu cür davam edib:
“Çox yüksək səviyyəli komandaya qarşı mübarizə aparırdıq. Azarkeşlərimizə də təşəkkür edirəm. Bizim azarkeşlərimiz heç də “Seltik” azarkeşlərindən geri qalmırlar. Hər birinə çox sağ ol deyirəm”.
- Bu gün “Qarabağ”ın ən zəif mövqeyi hücumameyilli oyunçular idi. Bununla razısız?
- Xeyr, mən meydançada zəif oyunçu görmədim. Hər biri mübarizə apardı. Nəzərə almaq lazımdı ki, rəqib də güclü “Seltik” idi. Düşünürəm ki, qarşıdakı oyunlarda daha yaxşı çıxış edəcəyik.
- Müdafiəçilər Şehiçə həddən artıq çox geriyə ötürmə verirdilər. Bu sizin tapşırığınız idi?
- Görürəm ki, fikirlərimiz üst-üstə düşmür. Siz başqa cür görürsünüz. Futbolçular lazım olanı edirdilər. Lazım olanda qapıçıya ötürmə verirdilər. Çalışdıq hücumameyilli oyun göstərək.
- Bunu sizin rəhbərliyiniz altındakı ən zəif oyun saymaq olarmı?
- Biz “Seltik”ə qarşı oynayırdıq. Ola bilər ki, hansısa çatışmazlıq oldu. Biz əlimizdəki oyunçulardan maksimum yararlanmağa çalışırıq. Futbolçular sona qədər mübarizə apardılar. Nəticədən razı qalmasam da, oyundan məmnunam. Mən komandama heç vaxt zəif demərəm. 15 yaşlı oyunçularla çıxış etsək də, komandamı zəif saymaram.
- Yeni transferlər növbəti mövsümdə çempion olmaq üçün gəliblər, yoxsa avrokuboklarda uğur qazanmaq üçün?
- Onların komandası hər iki cəbhədə mübarizə aparır. Bu gün Avrokubokda çıxış etdik, onlar da komandaya kömək etməyə çalışdılar. Onlar həm avrokuboklarda, həm də çempionatda uğurlu çıxış üçün transfer edilib.
- “Qarabağ” 6 oyundu ki, avrokuboklarda qələbə qazana bilmir. Bunun səbəbini nədə görürsüz?
- Azarkeşlərimiz bu gün bizi alqışla yola saldılar. Mənim ən çox istəmədiyim şey azarkeşi məyus yola salmaqdı. Çalışdıq yaxşı oyunla azarkeşləri məmnun edək. Nəticə qazanmağa çalışdıq, ancaq alınmırsa, deməli, qismətimizdə yoxdu.
