Azərbaycan hökumətinin uzun müddətdir diqqətdə saxladığı korrupsiya ilə mübarizə məsələsi bu gün Bakıda təşkil olunan beynəlxalq konfransda geniş müzakirə olunub. Hökumətin geniş tərkiblə iştirak etdiyi toplantı açıqlamalarla yadda qalıb. AZXEBER.COM-un məlumatına görə, Prezident İlham Əliyevin müraciətini Prezident Administrasiyasının rəhbəri Ramiz Mehdiyev açıqlayıb. O deyib ki, Azərbaycanda korrupsiyaya qarşı uğurla mübarizə aparmaq üçün möhkəm siyasi iradə var. "Azərbaycan korrupsiyaya qarşı mübarizə sahəsində bütün beynəlxalq təşəbbüslərə qoşulub, qanunvericilik bazasını təkmilləşdirir, islahatlar həyata keçirir. Azərbaycanda dövlət idarəçiliyində səmərəliliyin təmin edilməsi, elektron xidmətlərin inkişafı, korrupsiyaya qarşı mübarizə dövlət siyasətinin başlıca istiqamətlərindəndir", - deyə Prezident İlham Əliyevin Bakıda keçirilən “Korrupsiyaya qarşı mübarizə: beynəlxalq standartlar və milli təcrübələr” mövzusunda beynəlxalq konfrans iştirakçılarına müraciətində deyilir. Prezident Administrasiyasının rəhbəri Ramiz Mehdiyevin sözlərinə görə, təəssüflər olsun ki, korrupsiya bütün dünyada, o cümlədən Avropa ölkələrində də aktual problemlərdən biri olaraq qalır: “Ona görə də bu sahədə daim yeni təşəbbüslərin irəli sürülməsi zəruridir. Bununla bağlı Azərbaycanda tətbiq edilən dövlət xidmətinin göstərilməsində korrupsiyanı istisna edən, şəffaflığı təmin edən təcrübə digər ölkələr üçün də müsbət nümunə ola bilər”. Ramiz Mehdiyev Baş prokurorluq nəzdində korrupsiyaya qarşı mübarizə idarəsinin yaradılmasını, “ASAN xidmət”i unikal bir nümunə kimi göstərib. Administrasiyanın hüquq-mühafizə orqanları ilə iş şöbəsinin müdiri Fuad Ələsgərov Korrupsiyaya qarşı mübarizə istiqamətində qanunvericiliyin təkmişləşdirildiyini, milli fəailyyət planının hazırlandığını deyib. Konfransda vurğulanıb ki, Azərbaycanın Avropa Şurası Nazirlər Komitəsinə sədrliyi dövründə ölkəmiz bu sahədə öz töhfələrini verəcək. Ədliyyə naziri Fikrət Məmmədov deyib ki, beynəlxalaq əməkdaşlıq çərçivəsində korrupsiyaya qarşı mübarizə daha effektiv ola bilər və mübarizə çərçivəsində kompromisdən söhbət gedə bilməz. Baş prokuror Zakir Qaralov konranfsın əhəmiyyətindən danışarkən deyib ki, Azərbaycanın Avropa Şurası Nazirlər Komitəsinə sədrliyilə əlaqədar Azərbaycan hökuməti və Avropa Şurası tərəfindən Avropa Şurasının Korrupsiyaya Qarşı Mübarizə Aparan Dövlətlər Qrupu və Beynəlxalq Antikorrupsiya Akademiyasının iştirakı ilə keçirilən tədbirdə Avropa Şurasına üzv ölkələrin hüquq-mühafizə orqanlarının, müstəqil antikorrupsiya qurumlarının və möhtəbər beynəlxalq təşkilatların 130-dan artıq yüksək vəzifəli nümayəndəsi, mütəxəssislər, dövlət orqanı nümayənədələri, QHT-lər iştirak edir. Bir neçə ölkənin prokurorları, ədliyyə nazirləri, korrupsiya qarşı mübarizə idarələrin rəhbərlərinin iştirak etdiyi tədbirdə antikorrupsiya mövzusunda məruzələr dinlənib, müzakirələr açılıb.
