İspaniya Kral Futbol Federasiyası (RFEF) və UEFA La Liqanın XXIV turunda "Osasuna" ilə matçda "Real"ın ingiltərəli yarımmüdafiəçisi Cud Bellinqemi qırmızı vərəqə ilə cəzalandıran hakim Luis Monteronu müvəqqəti olaraq işindən uzaqlaşdırıb.
Bu barədə qurumun mətbuat xidməti məlumat yayıb.
C.Bellinqem fevralın 15-də keçirilən matçın 39-cu dəqiqəsində hakimi təhqir etdiyinə görə qovulub. Matçdan sonra isə futbolçu nalayiq sözlərdən istifadə etdiyini, lakin bunların hakimə ünvanlanmadığını bildirib.
RFEF-in araşdırmasından sonra müəyyən edilib ki, sözügedən hakimin konsaltinq xidmətləri göstərən bir şirkətdə payı var. Ehtimal olunur ki, şirkətin müştəriləri arasında İspaniyanın "Atletiko", İngiltərənin "Mançester Siti" və "Aston Villa" klubları, o cümlədən Fransa təmsilçisi PSJ, həmçinn bir sıra Avropa ölkələrinin komandaları var.
Hakim araşdırma müddətində işdən kənarlaşdırılıb. Araşdırma başladıqdan sonra L.Montero şirkətlə bağlı bütün paylaşımları silib. Daha sonra şirkətin heç vaxt klublar və idman təşkilatları ilə əməkdaşlığı olmadığını vurğulayıb.
Qeyd edək ki, "Real" İspaniya çempionatının turnir cədvəlində 24 turdan sonra 51 xalla ikincidir.
///report
