Sabiq deputat Rəbiyyət Aslanova Balakən rayonundakı "Alazançay" MMC-yə məxsus 12 mərtəbəli binada sahib olduğu qalmaqallı 4 ortaqlı mənzillə bağlı yayılan iddialara cavab verib.
AZXEBER.COM xəbər verir ki, R.Aslanova Pravda.az-a açıqlamasında bildirib ki, məsələ ilə əlaqədar hazırda məhkəmə prosesi davam edir: "Heç vaxt qeyri-qanuni nəsə etmərəm və bu, mümkün deyil. İşi məhkəməyə vermişəmsə, deməli, nəyəsə əsaslanmışam. Məhkəmənin son qərarı nə olacaqsa, bundan sonra danışacağıq. Kimin haqlı, kimin haqsız olduğu ortaya çıxacaq. Hər zaman Azərbaycan məhkəmələrinə, hakimlərinə inanmaq lazımdır. Məhkəmə prosesi yekunlaşmamış hansısa subyektiv fikri ortaya qoymaq olmaz. Nə mən, nə də əks tərəf..."
R.Aslanova sözügedən mənzilin Balakən rayon icra hakimiyyətinin sabiq başçısı Asif Məmmədovun xahişindən sonra "Alazançay" MMC tərəfindən ona müvəqqəti verilməsi barədə iddialara isə belə cavab verib: "Heç elə şey ola bilərmi? Mənim orderim də, sənədlərim də var. Evi 2008-ci ildə almışam, indi isə 2024-cü ildir. Bütün bu vaxt ərzində mən orada necə qeyri-qanuni qala bilərdim? Orderim yoxdursa, həmin evdə qalmağım hansı haqla mümkün olardı? Qeyri-qanuni qalan adam idimsə, elə birinci qərarla məhkəmə məni o evdən çıxarardı. 16 il vaxt keçib. 16 il hardasa qeyri-qanuni qalmaq mümkündür? Mənim orada evim var. Məhkəmə bitdikdən sonra görərsiniz ki, şər-böhtan xarakterli yazılarla Rəbiyyət Aslanovanın adına, nüfuzuna xələl gətirmək olmaz. Mən qanunları çox gözəl bilən adamam. Bütün addımlarımı da qanunla atıram".
