Məlum olduğu kimi, "Rəcəp İvedik 5” filminin treyleri Azərbaycanda birmənalı qarşılanmayıb.
Filmin fraqmenti sosial şəbəkələrdə geniş müzkairələrə səbəb olub.
Türkiyədə yaşayan bir sıra azərbaycanlı mediada açıqlamalar yayaraq, İvedikin bu kadrlarla azərbaycanlılara qarşı hörmətsizlik etdiyini iddia edib. Aktyor Şahan Gökbakar özü bu müzakirələrə aydınlıq gətirib və belə bir niyyətinin olmadığını deyib.
O, "Biz məyus etmək üçün deyil, güldürmək üçün varıq... Bizdən qardaş ölkəmizə qarşı səhv addım olmaz... (bu yerdə Azərbaycan və Türkiyənin qardaş olduğuna dair smaylik paylaşıb - red.) Fraqmentindəki son hissəsini paylaşdığımız boks səhnəsini başqa səmtlərə çəkməyə çalışanlar olmasın deyə filmdəki tam hissəni paylaşırıq. RƏCƏP İVEDİKİN AĞZINDAN ÇIXANLAR NƏ İMİŞ? Azərbaycandakı sevənlərimizə qovuşmağa can atıram... Hamınızı sevirəm...”, - deyə İnstaqramdakı paylaşımında bildirib.
Qeyd edək ki, bununla belə, Şahan Gökbakarın azərbaycanlı izləyiciləri narazılıqlarını yenə bu paylaşımın altında qeyd edib. Məsələn, mərhum şairimiz Nüsrət Kəsəmənlinin aktyor oğlu Rəşad Rəcəp İvedikin rinqdəki rəqibinin azərbaycanlı yox, erməni seçilməsinin daha düzgün olmalı olduğunu bildirib.
