Ötən gün Azərbaycan Respublikasının Prezidenti İlham Əliyev əfv sərəncamı imzalayıb. Bununla da bəzi məhbusların azadlıqdan məhrum olunma müddəti azaldılıb, bir qismi isə azad edilib. Sərəncam ümumilikdə 625 nəfərə şamil edilib, onlardan 425 nəfəri azadlığa çıxacaq.
Azərbaycan Respublikasının Prezidenti yanında Əfv Məsələləri Komissiyasının üzvü, "525-ci qəzet"in baş redaktoru Rəşad Məcid əfv sərəncamı və onun icrası barədə AZXEBER.COM-a fikirlərini bildirib.
Onun sözlərinə görə əfv sərəncamının verilməsi böyük humanizm və mərhəmət göstəricisidir: "Azərbaycan Respublikasının Prezidenti İlham Əliyevin 18 mart 2021-ci il tarixində imzaladığı əfv sərəncamı ölkəmizdə böyük humanizm və mərhəmətin göstəricisidir. Buna görə cənab Prezidentə təşəkkür edirik. Bildiyimiz kimi ötən il pandemiya səbəbindən əfv komissiyası toplaşmamışdır. Ötən ilin sentyabr ayında komissiyanın tərkibi dəyişildi və yeni sədr, yeni üzvlər əlavə olundu. Bununla yanaşı əfv komissiyasının 10 iclasında mindən artıq müraciətə baxıldı, hər bir müraciət ətrafında müzakirələr aparıldı.
3-5 saat davam edən iclaslarda üzvlər müraciətlərə münasibət bildirir, həssaslıqla yanaşır, səsverməylə qərarlar qəbul olunurdu. Nəticədə də, hesab edirəm ki, ən çox məhkuma şamil olunan bir siyahı hazırlandı”.
Rəşad Məcidin sözlərinə görə, sərəncamın şamil olunduğu məhbusların sayı 625 yox, daha çoxdur: "Biz çalışırdıq ki, komissiyanın iclasları Novruz Bayramınadək yekunlaşsın və sənədləri toplayıb cənab Prezidentə təqdim edək. Çox yaxşı ki, ayın 17-də sonuncu iclası etdik və martın 18-də sərəncam imzalandı. Sərəncam ümumilikdə 625 nəfərə şamil olundu, amma əslində bu say daha çoxdur.
Çünki əfv komissiyasının tövsiyyəsi ilə Ədliyyə Nazirliyinə tapşırıldı ki, bir sıra məhbuslar var ki, onların cəzasının bitməsinə qısa müddət, məsələn, 2-3 ay qalıb. Həmin məhbuslar əfv sərəncamı ilə yox, Ədliyyə Nazirliyinin məhkəmələri qaydası ilə azadlığa buraxıldı. Bu, təxminən 20-dən çox məhbusa şamil edildi. Ona görə də bizim əfv siyahımızdakı şəxslərin sayı 650-dən də artıqdır. Bu da son illərin ən çox məhbusa şamil edilən əfv sərəncamıdır. Buna görə bir daha cənab Prezidentə təşəkkür edirik”.
Aydın Nuri,
AZXEBER.COM
Aydın Nuri,
AZXEBER.COM
