Sosial şəbəkələrdə satılan zavod çörəklərinin üzərində istehsal tarixinin göstərilməsi ilə bağlı məsələ gündəmə gəlib.
Bir vətəndaş sosial şəbəkədə paylaşım edərək zavod üsulu ilə istehsal olunan bəzi çörəklərin üzərində yalnız istifadə müddətinin qeyd edildiyini, lakin məhsulun hansı tarixdə istehsal olunduğunun göstərilmədiyini bildirib.
Məsələ ilə bağlı AZXEBER.COM-a danışan Azad İstehlakçılar Birliyinin sədri Eyyub Hüseynov bildirib ki, ərzaq məhsullarının üzərində istehsal və yararlılıq müddətlərinin göstərilməsi istehlakçının düzgün seçim etməsi baxımından vacibdir:
"İstehlakçı üçün ərzaq malları ilə bağlı ən vacib informasiya malın buraxılma tarixindən sonra yararlılıq müddəti məsələsidir. Onu qeyd edim ki, Azərbaycan bu sahədə Avropadan, Amerikadan bir xeyli irəlidədir, eləcə də Yaponiyadan. Bu ölkələrdə ərzaq mallarının yalnız son yararlılıq müddəti göstərilir. Sanki o ölkələrdən ilham alan və bu səhv yolu gedən yerli istehsalçılar da var. Çörək istehsalında da bu görünür”.
Ekspert qeyd edib ki, bəzi zavod çörəklərinin üzərində həm istehsal, həm də yararlılıq müddəti ilə bağlı məlumatlar tam şəkildə göstərilmir:
"Bəzi zavod çörəklərinin üzərində nə buraxılma tarixi var, nə də yararlılıq müddəti var. Yalnız zavod çörəyi qismində "Çörəkçi” zavodunun "Çörəkçi” adı altında olan çörəklərin üzərində hər iki tarix var. Ondan qalan çörəklərin demək olar ki, 90 faizində hər iki tarix yoxdur. Yalnız bağlanan yerində bir tarix, istehsal tarixi qoyulur”.
E.Hüseynovun sözlərinə görə, məhsulun üzərində istehsal və saxlanma müddətinin göstərilməsi istehlakçıya məhsul barədə daha dolğun məlumat əldə etməyə imkan verir:
"Adını çəkdiyim "Çörəkçi” həm buraxılma tarixini yazır, həm də onun saxlanma müddətini yazır və burada istehlakçı düzgün seçim edə bilir. Qalanlarsa yalnız bir tarix, istehsal tarixi yazır. Bu cür markalanma istehlakçı hüquqlarının pozulmasıdır. İstehlakçıların hüquqlarının müdafiəsi haqqında qanunun tələblərinə əməl edilməsi, eləcə də Nazirlər Kabinetinin 94 saylı qərarının tələblərinə riayət olunması vacibdir. Bütün ərzaq mallarının üzərində onun buraxılma müddəti, yararlılıq müddəti, saxlanılma temperaturu və digər məlumatlar olmalıdır. Çox təəssüf ki, yoxdur. Zavod çörəkləri bunun bariz nümunəsidir”.
Fəridə Əsədzadə
