Sosial şəbəkələrdə müğənni Rüfət Axundovun avtomobil idarə edərkən Mərdəkan-Zaqulba yolunda müəyyən olunmuş sürət həddini aşması ilə bağlı görüntülər yayılıb. Belə ki, Mərdəkan şosesi-Zuğulba yolunda hərəkətdə olan Axundov 90 sürət həddini 127 km/saat sürətlə aşıb. O həmin görüntüləri sosial şəbəkə hesabında paylaşıb.
Məsələ ilə bağlı Bakı Şəhər Dövlət Yol Polisi İdarəsinin İctimai qurumlarla əlaqələr bölməsinin rəisi, mayor Araz Əsgərli AZXEBER.COM-a açıqlama verib.
Onun sözlərinə görə, sürət həddinin aşılması ilə bağlı hansısa qayda pozuntusunu lentə alınmış görüntüdən yox, xüsusi texniki qurğu vasitəsilə müəyyən etmək lazımdır:
"Hansısa görüntüyə görə sürücüyə protokol yazıla bilməz. Qayda pozuntusunu yollarda quraşdırılmış radar qurğuları elektron şəkildə müəyyən edir. Sürət həddini aşan avtomobilə isə bu halda radar vasitəsilə müəyyən olunarsa, sürücü İnzibati Xətalar Məcəlləsinin 328.2 bəndinə əsasən 50 manat 2 bal ilə cərimə olunur. Həmin görüntü barədə araştırılma aparılmalıdır ki, qayda pozuntusunun olub-olmaması müəyyən olunsun. Sosial şəbəkələrdə yayılan sözügedən görüntülər araşdırılıb hüquqi tədbir görüləcək. Bu elektron formada müəyyən edilən istənilən qayda pozuntusu üçün keçərlidir”.
Araz Əsgərli kimliyindən asılı olmayaraq bütün vətəndaşları qaydalara ciddi əməl etməyə çağırıb:
"Kimliyindən asılı olmayaraq hər kəs qaydalara əməl etməlidir. Yüksək sürət zamanı belə havalarda qəza baş verərsə, bu zaman maşını idarə etmək daha çətinləşir. Hər kəs özü-özünün polisi olmalıdır. Yol hərəkəti qaydaları elə bir qaydalardır ki, bu qayda pozuntusunu etdikdən sonra artıq düşünməyə zamanımız olmur. Bu da faciə ilə nəticələnə bilər. Qayda pozmamaq ilk öncə insanın özü üçün, daha sonra inzibati məsuliyyət üçün önəmlidir. Xüsusən də tanınmış simalar bu kimi şeylərə daha çox önəm verməlidir, insanlar onları tanıyır, örnək alır. Onlar nümunəvi hərəkətlər etdikdə polisin də işini asanlaşdıra cəmiyyətə isə müsbət mənada örnək ola bilərlər”.
Aysel Hacızadə
