"Separatçıların Azərbaycanı tərk etməsi bir çox mətləblərdən xəbər verir”.
Xəbər verdiyimiz kimi Xankəndi-Gorus istiqamətində "Laçın” sərhəd-buraxılış məntəqəsində erməni əsilli şəxslərin sərbəst keçidi növbəti dəfə təmin edilib. Məntəqədən 60-a yaxın şəxsin sərbəst şəkildə keçid etdiyi bildirilir.
Məlum olub ki, onlar əsasən Azərbaycan ərazisində separatizmi alovlandırmağa çalışan, ona dəstək verən şəxslərdir. Eyni zamanda həmin şəxslərin əksəriyyəti Rusiya vətəndaşlığını qəbul etmiş, Rusiya pasportu daşıyan insanlardır.
Mövzu ilə bağlı AZXEBER.COM-a danışan Milli Məclisin deputatı Elman Məmmədov açıqlamasında bildirib ki, Rusiya Azərbaycanın arxasından bu oyunları çevirməyə 2020-ci ilin noyabrdan başlayıb:
"Ermənilərin arzusu ilə onlara Rusiya vətəndaşı pasportu paylanılıb. Sonra nədənsə ya ermənilər istəmədilər, ya da onlar bu prosesi dayandırdılar. İndi də qaçıb gedirlər. Təbii ki, onların içərisində rus yoxdur, hamısı ermənidir. Separatçıların getməyi bir çox mətləblərdən xəbər verir. Ola bilsin ki, ruslar xoşa gəlməz bir vəziyyət yaradacaqlar, ona görə də öz vətəndaşlarını tədricən ərazidən kənarlaşdırırlar. Ya da həmin adamlar artıq başa düşürlər ki, yolun sonuna çatıblar. Onların buradakı fəaliyyətinə artıq son qoyulub”.
Elman Məmmədov hesab edir ki, artıq Qarabağdakı ermənilər üçün iki seçim var:
"Birinci seçim - Azərbaycan vətəndaşlığını qəbul edib, Azərbaycan qanunları ilə yaşasınlar. İkinci seçim isə, ərazimizi tərk edib, çıxıb getsinlər. Bu Azərbaycan dövlətinin qarşıya qoyduğu tələbdir. Azərbaycan heç kimi zorla çıxarmır. Təklif verib ki, vətəndaşlığı qəbul etsinlər. Azərbaycan dövləti ərazisində başqa ölkənin vətəndaşı kimi yaşamaq istəyənlər üçün yol açıqdır. Görünür köç başlayıb, ümid edirik ki, sayları daha çox olacaq”.
AZXEBER.COM-a danışan Milli Məclisin deputatı Vüqar İskəndərov isə düşünür ki, Vaqif Xaçaturyanın aqibətini öz üzəridə hiss edən terorçular geci-tezi Azərbaycan qanunları ilə mühakimə olunacaqlar:
"Son zamanlar bir ovuc xunta rejminin nümayəndəsinin Qarabağda yaşayan erməni vətəndaşlarımızı girov saxlaması, onların qərar vermələrinə şərait yaratmamaları, xof yaratmaları erməni sakinlərinin Azərbaycana reinteqrasiyasına mənfi təsir göstərməkdədir. Belə ki, Bakıda və digər şəhərlərdə təklif olunun görüşlər hələlik cavabsız qalıb. Vaqif Xaçaturyanın aqibətini öz üzəridə hiss edən terorçular geci-tezi Azərbaycan qanunları ilə mühakimə olunacaqlar. Çünki onların əli azərbaycanlı insanların qanına batıb. 60-a yaxın Rusiya pasportu olan şəxsin Xankəndi və ətraf bölgələrdən ərazimizi tərk etməsi onu deməyə əsas verir ki, artıq bu təhlükənin yaxında olduğu hiss edirlər. Buna görə də, zamanında Azərbaycanı tərk etmək qərarı veriblər. Onları hansı aqibətin gözlədiyinin fərqinə varıblar”.
Deputat qeyd edib ki, ermənilər Xankəndində tələm-tələsik öz obyeklərini satışa çıxarmağa başlayıblar:
"Xankəndi və ətraf ərazilərdə evlərin qiyməti aşağı düşüb. "Telegram” kanallarda şəhərdə "Asan Xidmət” in olacağını, Azərbaycan qanunlarının işləyəcəyini bildirirlər. Vaxtıdan oranı tərk etməli olduqlarını söyləyirlər. Amma sadə insanlar anlayırlar ki, onlar Azərbaycan qanunları, bayrağı altında firəvan yaşaya biləcəklər. Azərbaycan tərəfi səbrlə bu yolla gedir və Qarabağdakı erməni vətəndaşlarımızın reinteqrasiya olması üçün vacib addımlar atır”.
Şəbnəm Zahir
