Rusiya yaxın günlərdə və həftələrdə Ukraynaya daha 1000 muzdlu əsgər göndərməyə hazırdır.
AZXEBER.COM CNN-ə istinadən xəbər verir ki, bu barədə Qərb kəşfiyyatının yüksək vəzifəli nümayəndəsi xəbərdarlıq edib. Onun fikrincə, Moskva mülki əhali arasında xeyli itki ilə nəticələnən şəhərləri bombalaya bilər.
ABŞ rəsmisi isə bildirib ki, Rusiya yaxın gələcəkdə 1000-ə qədər muzdlu əsgər göndərməyi planlaşdırır.
Onun sözlərinə görə, Rusiya Ukraynaya işğalının ikinci həftəsinə daxil olarkən, muzdlular zəifləmiş qoşunları gücləndirəcək.
O əlavə edib ki, ABŞ artıq Ukraynada olan muzdluların ukraynalıların gözlənildiyindən daha sərt müqaviməti qarşısında zəif çıxış etdiyini nəzərə alıb və fevralın sonuna kimi 200-ə yaxın belə muzdlu döyüşdə öldürülüb.
ABŞ rəsmisi onu da bildirib ki, Rusiya indi Ukraynanı tabe etmək üçün şəhərləri bombalamağa hazırdır.
"Bu, çox kobud yanaşmadır. Ağır silahlar təkcə çəki baxımından deyil, həm də vura biləcəkləri zərər baxımından daha ağırdır və onlar daha az seçicidirlər." - deyə kəşfiyyat rəsmisi bildirib.
Digər rəsmilər Rusiyanın strategiyasının hərbi hədəflərdən mülki şəxslərə keçdiyini və daha çox hücumların məskunlaşan ərazilərə yönəldiyini qeyd ediblər.
Qeyd edək ki, "Bellingcat" onlayn nəşrinin araşdırmaçı jurnalisti Hristo Qrozev bəyan edib ki, Rusiya Ukraynaya müdaxilə zamanı demək olar ki, bütün hərbi resurslarını istehlak edib.
