Ukrayna ilə bağlı danışıqlarda Avropa İttifaqının (Aİ) iştirakı istisna edilir, bununla belə, Brüssel Kiyevə hərbi və digər yardımları dayandırmaqla münaqişənin həllində rol oynaya bilər.
AZXEBER.COM "Report”a istinadən xəbər verir ki, bu barədə Rusiya xarici işlər nazirinin müavini Aleksandr Qruşko jurnalistlərə açıqlamasında bildirib.
"Bu gün Avropa ilə münasibətlərdə hər hansı irəliləyişin ola biləcəyinə heç nə dəlalət etmir. Aİ ölkələri və avropalılar nədənsə Ukrayna münaqişəsinin həlli ilə bağlı danışıqlar masasında yer tələb edirlər. Bu, sadəcə təəccüb doğurur", - o qeyd edib.
A.Qruşko vurğulayıb ki, Avropa siyasətinin bütün mahiyyəti münaqişənin siyasi-diplomatik vasitələrlə başa çatmasına imkan verməmək, Rusiya üzərində tam qələbə qazanana, onun strateji məğlubiyyətinə qədər davam etdirməkdən ibarət olub.
"Əslində, bu, Ukraynada münaqişənin həlli ilə bağlı gələcək danışıqlarda Avropa İttifaqının və Avropa ölkələrinin hər hansı rolunu istisna edir", - XİN başçısının müavini bildirib.
Onun sözlərinə görə, "əgər Avropa həqiqətən münaqişənin həllində hansısa rol oynamaq istəyirsə, Kiyev rejiminə hər cür hərbi və digər dəstəyi dayandırmalıdır".
