Rusiya xərçəngə qarşı ilk peyvəndə başlayıb.
AZXEBER.COM xəbər verir ki, bu barədə Rusiya mətbuatına Qamaleeya adına Epidemiologiya və Mikrobiologiya Elmi-Tədqiqat Mərkəzinin direktoru, akademik Aleksandr Gintsburq məlumat verib.
Gintsburqun sözlərinə görə, Rusiyanın Səhiyyə Nazirliyi ilə razılaşdırılmış plana əsasən, neoantigenlərə əsaslanan xərçəng əleyhinə peyvənd ilkin mərhələdə melanoma (dəri xərçəngi) diaqnozu qoyulmuş məhdud sayda xəstələr üzərində sınaqdan keçiriləcək:
"Yaxın aylarda bu eksperimental vaksinoloji yanaşmanın tətbiqinə başlayacağıq. Hazırda yalnız istehsal mərhələsindəyik. Peyvəndləri biz hazırlayırıq, amma onları Herzen adına Onkologiya İnstitutuna və Bloxin adına Onkologiya Elmi Mərkəzinə çatdıracağıq".
Qeyd edilir ki, bu yeni peyvənd şəxsi immun cavab əsasında hazırlanır və hər bir xəstənin genetik xüsusiyyətlərinə uyğun olaraq fərdiləşdirilir. Yəni bu, klassik universal vaksinlərdən fərqli olaraq, xüsusi "neoantigenlərə" əsaslanan fərdi yanaşma ilə yaradılıb.
Akademik Gintsburq onu da əlavə edib ki, bu yanaşma təkcə Rusiyada deyil, beynəlxalq elmi dairələrdə də ciddi maraq doğurub:
"Biz bu mövzu ilə bağlı onlarla məktub almışıq - müxtəlif ölkələrdən olan onkoloqlar və tədqiqatçılar layihə ilə maraqlanırlar. Bu da göstərir ki, yeni vaksinin tətbiqi gələcəkdə beynəlxalq miqyasda genişlənə bilər".
Xatırladaq ki, Qamaleeya Mərkəzi koronavirus pandemiyası zamanı "Sputnik V" vaksinini hazırlayan əsas elmi müəssisə olub və indi onkologiyada peyvənd yanaşması üzərində işləyir. Ekspertlər bu təşəbbüsün uğur qazanacağı təqdirdə, onkoloji xəstəliklərlə mübarizədə yeni bir mərhələnin başlaya biləcəyini bildirirlər.
///Musavat.com
